رواية براءة رغم النضج رعد وليان كاملة جميع الفصول بقلم اسراء ابراهيم

رواية براءة رغم النضج رعد وليان كاملة جميع الفصول هى رواية من تأليف المؤلفة المميزة اسراء ابراهيم رواية براءة رغم النضج رعد وليان كاملة جميع الفصول صدرت لاول مرة على فيسبوك الشهير رواية براءة رغم النضج رعد وليان كاملة جميع الفصول حققت نجاحا كبيرا في موقع فيسبوك وايضا زاد البحث عنها في محرك البحث جوجل لذلك سنعرض لكم رواية براءة رغم النضج رعد وليان كاملة جميع الفصول

رواية براءة رغم النضج رعد وليان كاملة جميع الفصول

هو يا مني اختك مالها تصرفاتها غريبة كدة ليه ؟،، بصراحة شكلها يضحك

قال كدة وائل وهو بيبص علي ليان  باستغراب ووقتها سمع رد مني خطيبته اللي كان باين عليها الضيق من سؤاله :

لو سمحت يا وائل بلاش تتكلم عن ليان اختي بالطريقة دي ،، واعتقد انت ملكش دعوة هي عاملة ليه كدة ،،حاجة متخصكش يعني 

اضايق وائل من رد مني عليه بصلها بعتاب وهو بيقولها :

اخس عليكي يا مني ،، هو انا غريب عنكم عشان تقوليلي كدة ،،وبعدين ما ليان اختي زي ما هي اختك ،،انا بس كنت بسأل هي ليه بتتصرف كدة 

اتنهدت مني بحزن وبعدين ردت علي وائل وهي بتبص لاختها ليان :

متزعلش مني يا وائل ،،انا مقصدش انفعل عليك ،،بس انت متعرفش ليان اختي غالية عليا ازاي ، رغم انها اصغر مني بسنة بس كنت بحس دايما انها امي مش اختي ،،ودايما عندي احساس بالذنب بإن اللي هي فيه ده انا السبب فيه  

قالت مني اخر جملة من كلامها وهي بتعيط جامد اوي ووائل اتأثر بعياطها وصعبت عليه وكان لسة هيتكلم ويواسيها بس قاطعته ليان اللي قربت من مني بلهفة :

ايه ده ،، انتي بتعيطي ليه يا مني ،،اوعي يكون عمو الوحش ده هو اللي زعلك ،، 

مسحت مني دموعها وردت علي ليان بابتسامة حزينة:

لا يا حبيبتي ،، انا كويسة ،،عمو وائل بيحبني وابدا مش هيخليني اعيط

بصت ليان لوائل بغضب وكأنها مش مصدقة كلام مني اختها عنه وبعدين اتكلمت بحد*ة :

انا عارفة ان مني اختي بتحبك بس انا بقي مش بحبك ولو زعلتها انا هجري وراك واحدفك بالطو*ب انت فاهم يا عمو انت ؟

وائل اتصدم من كلام ليان ليه وبص لمني اللي اعتذرت ليه بعنيها عن تصرفات ليان وبعدين اتكلمت بتردد:

بقولك ايه يا ليان يا حبيبتي ،، يلا ادخلي غيري هدومك عشان عمو وائل عازمنا برة عالغدا 

سقفت ليان بفرحة وهي بتتنطط وردت بحماس قبل ما تجري علي اوضتها :

هييييه ،، انا هلبس علطول يا مني ،،مش هتأخر ابدا ،، وعد 

جريت ليان علي اوضتها وكانت متابعاها مني بابتسامة واتكملت وقتها بتنهيدة :

عرفت يا وائل ليه مكنتش بحب انك تيجي كتير هنا ،، ،، انا مكنتش حابة اعرف حد حاجة عن ليان لان كل اللي بيشوفها بيجر*حها بكلامه وسخريته منها ،، ولما قررت اعرفك كان بعد ما اتأكدت اني فعلا اخترت صح 

ابتسم وائل ومسك ايد مني وهو بيقولها بحب :

وانا اوعدك انك عمرك ما هتتندمي علي اختيارك ابدا يا حبيبتي 

ابتسمت مني ولسة هترد اتفاجأت بليان وهي واقفة قدام باب القوضة ومربعة ايديها وبتبصلهم بغيظ ،، اتوتر وائل وساب ايد مني بسرعة وهو بيقول بتهرب :

انا بقول نمشي بقي احسن حاسس ان اختك ليان عايزة تو*لع فيا 

ضحكت مني وفعلا اخدهم وائل ومشيو 

.........................

ازاي بس يا فندم ،،حضرتك انا مينفعش ابات برة يوم واحد ،،ازاي بس هبات اسبوعين ،،انا عندي اخت صغيرة وانا كل اللي ليها ،،ازاي هسيبها اسبوعين لوحدها بس   

قالت كدة مني بحزن وهي باصة لعلاء مديرها في الشغل وبصلها هو بضيق قالها بجدية :

الشغل مفيهوش اعذار يا مني ،، تقدري تخلي حد يقعد معاها الفترة بتاعة غيابك وياريت تحضري نفسك عشان المريضة محتاجة رعاية خاصة 

اتنهدت مني بحيرة وبعدين ردت بقلة حيلة :

تمام يا فندم اللي حضرتك تشوفه ،، بعد اذنك 

خرجت مني من اوضة مدير المستشفي اللي بتشتغل فيها وكانت مش عارفة تعمل ايه او تفكر ازاي وكل اللي شاغلها هو ليان اختها ،،ازاي هتسيبها اسبوعين لوحدها ،، دي عمرها ما حصلت ابدا معاها ،، اتنهدت بحيرة وبعدين قعدت تفكر كويس لحد ما قررت حاجة مهمة وبعدين خب*طت علي مكتب علاء ودخلتله تاني 

......................

في ڤيلا في مدينة الاسكندريه بالتحديد في اوضة رعد التهامي كان واقف بيعدل بدلته قدام المراية  وهو كله هيبة وشكله وكاريزمته تخلي اي حد واقف قدامه يخاف منه ويعمله احترام ،، خلص لبس وبص للصورة المتعلقة عالحيطة شوية وبعدين اتصنع الجدية وخرج من اوضته وراح علي اوضة قريبة منه وخب*ط ودخل وفجأة ابتسم وقرب من جدته اللي اول ما شافته ابتسمت :

كنت عارفه اني مش ههون عليك وهتيجي تصبح عليا زي عادتك 

ابتسم رعد وقرب من فريدة جدته وباس ايديها وقالها بحب :

وهو انا اقدر برضه يا فيفي ،،ده انتي حبيبتي ،، بس اوعي تفتحي الموضوع ده تاني احسن ازعل بجد بقي المرادي 

اتنهدت فريده وردت علي رعد بصوت هادي :

انا عايزة اطمن عليك يا رعد ،، يا حبيبي انا مش هعيشلك العمر كله،، وانت عارف كويس اوي اني صحتي دلوقتي بقت في النازل 

قرب رعد بسرعة من فريدة وحض*نها وهو بيقولها بلهفة :

بعد الش*ر عليكي يا حبيبتي ،، انتي كويسة وزي الفل ،، وان شاء الله ربنا يطول في عمرك عشان عالم اني مليش غيرك 

حبت فريدة تغير جو الحزن ده فاتكلمت بهزار وهي بتخ*بط ايد رعد بخفة : 

ايه يا واد يا رعد عايزني اخلل ولا ايه ،،ما كلنا مسيرنا هنموت ،، المهم انت هتتأخر انهارده زي عادتك برضه  ولا ايه 

ابتسم رعد ورد بثقة وهو بيبصلها بحب :

لا يا فيفي ،،للاسف مش هعرف اتأخر عشان متبقيش لوحدك ،، وخصوصا ان مفيش حد غير عم سيد الطباخ ومراته ،، صحيح انا كلمت المستشفي والدكتور علاء قالي انه هيبعت ممرضة شاطرة جدا عشان تتابع معاكي وتراعيكي ولو ارتحتي ليها يا نينة اوعدك هخليها تعيش معاكي علطول 

ابتسمت فريدة وردت بحنية علي رعد وهي بطبطب علي ايده :

متقلقش عليا يا رعد ،،انا كويسة ،،انا بس محتاجة اطمن عليك وبعدين انت لو سمعت كلامي  واتجوزت هتبقي مراتك معايا هنا وبعد كدة ولادك كمان 

نفخ رعد بضيق ورد بجمود وهو بيقوم يقف :

وايه اللي يضمنلي انها متكونش من نفس عينة اللي قبلها يا نينة ،، عموما خلاص لو سمحتي ياريت منتكلمش في الموضوع ده تاني ،،انا رايح الشركة،، لو احتجتيني في اي وقت كلميني هاجي علطول ،، سلام يا قمر

خرج رعد بعد ما قال اخر كلامه وكانت متابعاه فريدة جدته بحزن علي حالته اللي هو فيها واللي وصله من يوم اللي حصل ودعتله من قلبها ان ربنا يسعده ويعطره في بنت الحلال اللي تستاهله 

.........................

بعد يومين في بيت مني كانت واقفة في اوضتها وبتقفل شنطتها وبتنده بصوت عالي :

يلا يا ليااان ،،كل ده بتجيبي شنطتك من اوضتك ،، اومال لو مكنتش انا اللي وضبتها امبارح 

خرجت مني من اوضتها وهي شايلة شنطتها وليان كمان خرجت بشنطتها بس وهي مكشرة وباين انها زعلانة فسألتها مني بتنهيدة :

مالك بس يا لياان ،، ايه اللي مزعلك ومخليكي مكشرة كدة بقي دلوقتي  

ليان بصت لمني اختها بزعل وردت عليها وهي بترمي شنطتها عالارض :

عشان انا مش عاوزة امشي واسيب اوضتي ولعبي ،، انا قولتلك روحي انتي وانا هقعد العب باللعب بتاعتي الحلوة كلها 

اتنهدت مني بتعب وحطت شنطتها عالارض وقربت من ليان وقالتلها بحنية :

ماهو انا مش هقعد كام ساعة وارجع زي كل يوم يا ليلو يا حبيبتي ،، المرادي هتأخر وهقعد اسبوعين ،،يعني كتير اوي ،،ينفع بقي اسيبك كل ده لوحدك ،، اكيد مينفعش فعشان كدة هاخدك معايا 

شهقت ليان بصدمة وبقت تعد علي ايديها وتقول بنفس صدمتها :

با نهاري ،، يعني يوم ويوم ويوم ويوم ،، لا ده كتير اوي يا مني ،، يعني الليل هيجي عليا وانتي مش هتكوني هنا ،، لا انا بخاف اوي يا مني والنبي 

قالت ليان اخر كلامها وهي بتمسك ايد مني بخوف فبصتلها مني بحنية وردت عليها وهي بطبطب علي كتفها بحب :

يبقي اسمعي كلامي يا حبيبتي وتعالي معايا الشغل ولما اخلص هنرجع تاني هنا وهتلاقي لعبك وحاجتك مستنياكي 

ابتسمت ليان بحماس وردت ببرائة وهي بتبص وراها علي اوضتها :

صح يا مني ،، سلام يا اوضتي ،،هرجعلك بسرعة اوي خالص 

اتنهدت مني بتعب وشالت شنطة ليان وشنطتها وخرجو من الشقة 

...............................

بعد كام ساعة كانت نازلة مني وليان من العربية قدام ڤيلا رعد بعد ما وصلهم وائل بعربيته ودخلهم الامن لحد باب الڤيلا باوامر من رعد وكان واقف وائل مع مني و بيأكد عليها ان لو في اي حد ضايقها هي او ليان تكلمه علطول ومني فرحت لاهتمامه بيها وكانت بتتكلم معاه بس فجأة افتكرت ليان وبصت حواليها وهي بتنده عليها بلهفة و ملقتهاش فجريت تشوفها بس فجأة شهقت بصدمة لما اتفاجأت بيها ...يتبع 

↚

اتصدمت مني وهي شايفة ليان وسط الزرع ورشاش المية اللي في الارض شغال وهي وسط المية بتلف حوالين نفسها وبتلعب ،، شهقت مني بخضة وقالت بصوت واطي بينها وبين نفسها :

يا نهار مش فايت ،،هترفد من قبل ما اشتغل ،، حرام عليكي يا ليان ،، ده ميعرفوش اني جايبة معاايا اختي 

ندهت مني علي ليان بصوت عالي بس ليان مكنتش مركزة غير في المية اللي هي وسطيها وفرحتها بالزرع وقبل ما تقرب مني وتلحقها كان دخل رعد الڤيلا بعربيته واتفاجئ بليان وهي بتلف حوالين نفسها كدة فكشر باستغراب وهو متابعها بعنيه وبعدين وقف العربية ونزل وقرب منها وهو بيقول بصوت خلي ليان تترعب وتقف مرة واحدة :

انتي مين وايه اللي بتعمليه ده في بيتي ؟

اتنفضت ليان ووقفت مرة واحدة بس من الخضة رجليها اتزحلت في الطينة وكانت هتقع بس رعد لحقها وحاوطها بايديها بتلقائية منه اول ما شافها بتقع وليان كمان مسكت في بدلته وهي بصاله وشهقت بخوف احسن تقع ،، فضلو شوية باصين لبعض ورعد كان مدقق في ملامحها باستغراب ،،حاجة جواه شدته ليها وانه يفضل مركز في تفاصيلها ،، بس لما انتبه لنفسه وكان هيبعد اتفاجأ بيها بتقوله بطفولة :

اوعي تسيبني يا عمو والنبي احسن اتزحلق واقع واموت 

رفع رعد حاجبه بصدمة من طريقة ليان في الكلام وكأنها طفلة وقال بصدمة :

هو اللي بيتزحلق وبيقع بيموت ؟ ،، اول مرة اعرف،، ثم انتي ازاي تعملي اللي عملتيه ده وتبهدلي الزرع كدة ؟ 

قال كدة رعد وهو بيشد ليان من ايديها بعيد عن الزرع وبيكلمها بحد*ة بس اتفاجأ بيها بتقوله بغضب وهي بتشاور بايديها قدام وشه :

علي فكرة بقي انت السبب يا عمو  يا وحش انت ،، انت اللي زعقت جامد خالص وخليتني اتخض واقع وكنت هموت ،، انت اصلا صوتك وحش اوي وانا مبحبكش 

كشر رعد بغضب وصدمة في نفس الوقت واتأكد ان ليان مخها في حاجة وانها مش طبيعية وقبل ما يتكلم كانت اتدخلت مني اللي قربت عليهم وهي مرعوبة من شكل رعد وهيبته :

ااحنا اسفين اوي يا فندم حقيقي مقصدش ان يحصل كدة 

رعد بص لمني بتقييم وبعدين اتكلم بحد*ة :

ممكن اعرف انتو مين وازاي تتعاملو مع بيتي كأنه ملجأ 

ليان كانت باصة لرعد ومكشرة عشان شايفاه بيتكلم بعصبية وهو كان ملاحظ نظراتها ليه بس اتجاهلها وبص لمني اللي ردت بتوتر :

حضرتك انا مني ،، الممرضة الجديده لمدام فريدة ،، ودي تبقي اختي ليان واعذرها لانها زي ما انت شايف كدة 

رعد بص لليان وبعدين رجع بص لمني وقالها باستفهام:

واختك جاية هنا تعمل ايه يا انسة ؟،، مش المفروض ان حضرتك بس اللي تكوني هنا ؟

قرب وائل واتدخل بعد ما كان متابع الحوار من الاول وكان مضايق من طريقة رعد مع مني وليان اللي كلها غرور :

حضرتك انا وائل سيف الدين خطيب مني وكنت بوصلهم لهنا ،، مني كلمت مدير المستشفي وشرحتله حالة ليان وانها الراعية ليها وانها مالهاش حد غيرها ومينفعش تسيبها وهو قدر ده وقال انه هيبلغ حضرتك ويعرفك 

رعد كان باصص لوائل بغموض بعد ما سمع كلامه وكانت مني متوقعة من شخصية رعد انه لا يمكن هيوافق وكان باين علي ملامحه القا*سية بس اتفاجأت بيه بيقول بجدية :

انا محدش بلغني بحاجة بس عموما مفيش مشكلة 

قال رعد كلامه وسابهم ودخل وكان متابعه وائل اللي كان مكشر وقال بضيق :

اووف ،،انسان مغرور اوووي 

اتنهدت مني براحة ومسكت ليان من ايديها وهي بتبص لوائل وبتقوله بابتسامة :

الحمد لله انه وافق ،،انا قولت هيرفض اصلا ،، يلا هدخل انا وهبقي اكلمك بقي ،، خد بالك من نفسك يا وائل 

ابتسم وائل ورد بتنهيدة وهو بيبص لمني بحب :

والله لو عليا مش عاوزك تتبهد*لي في الشغل ده وقولتلك اقعدي وانتي ملزمة مني انتي وليان بس حقيقي انتي عندية اوي 

ابتسمت مني وردت بحب وهي بتبص لوائل بفخر شافو في عيونها :

وانا عارفة ومتأكدة انك قدها يا وائل بس سيبني علي راحتي ولما نتجوز وقتها صدقني هتلاقيني من نفسي بقولك انا هقعد بقي ،، يلا سلام 

..........................

في اوضة واسعة في الدور الارضي كانت واقفة مني بترص هدومها وهدوم ليان في الدولاب وبعد ما خلصت بص لليان اللي كانت بتلعب في التسريحة وقربت منها ومسكتها من ايديها وقعدتها قدامها عالكرسي وقالتلها بهدوء :

اسمعيني كويس يا ليان يا حبيبتي ،، مش انتي يهمك ان مني اختك حبيبتك تكون مبسوطة منك 

ابتسمت لسان وحركت راسها بتلقائية وردت :

اه طبعا يا ابلة مني 

ابتسمت مني وردت بحب وهي بتمسك ايد ليان :

طيب بصي يا حبيبتي ،، احنا هنا في الشغل بتاعي يا ليان فعايزاكي تسمعي الكلام ومتخرجيش من القوضة الا لما انا اقولك او تستأذنيني الاول عشان ميحصلش مشكلة لاختك حبيبتك وازعل منك كمان 

ردت ليان ببرائة وهي باصة لمني وقالتلها بسرعة : 

حاضر يا ابلة مني اوعدك اني هسمع كلامك ومش هعمل حاجة وحشة ابدا  وكمان عشان عمو البعبع اللي كان برة ده ميزعقلكيش 

ضحكت مني بتلقائية علي كلام ليان وقالت بضحك:

يا نهاري يا ليان لو سمعك وانتي بتقولي عليه كدة ،،هيعمل منك شاورما ،، يلا هسيبك انا واطلع اشوف شغلي وزي ما اتفقنا ماشي 

حركت ليان راسها بطاعة ومني سابتها وخرجت بشنطة العلاج وادواتها وليان بعد ما مني خرجت بقت تلف في الاوضة بفرحة لانها واسعة جدا واوسع من اوضتها فكانت بتلف حوالين نفسها وهي بتغني بفرحة 

...........................

خب*طت مني علي اوضة فريدة ام رعد ودخلت لما اذنت ليها بالدخول واستقبلتها فريدة بابتسامة وهي بتقول بود :

انتي اكيد الممرضة اللي رعد قالي عليها 

ابتسمت مني بحب وردت باحترام وهي بتقرب منها وبتمد ايديها وتسلم عليها :

ايوة يا فندم ،، انا مني ،، الممرضة الجديدة اللي هتابع حالة حضرتك لحد ما تبقي بخير 

ابتسمت فريدة وردت بفرحة باينة في صوتها :

ياريت بلاش حضرتك دي وقوليلي يا ماما الحاجة ،،مش انا زي امك برضه ؟ ،، والله انا كنت بدعي ربنا ان البنت اللي هتيجي تكون ودودة وكويسة عشان تملي عليا وحدتي دي احسن من العلاج اللي باخده الف مرة

ابتسمت مني براحة لان فريدة طلعت عكس حفيدها خالص وشخصيتها تتحب من اول مقابلة فقالتلها بحب :

والله انا يكونلي الشرف اني اقولك يا ماما وهفرح جدا لاني والدتي اتوفت من زمان ومليش حد الا اختي بس 

ردت فريدة بتلقائية وقالت لمني وهي بتشاور علي صورة عالكوميدينو :

انا مكنش ليا غير بنتي علا واتوفت من زمان وسابتلي رعد هو اللي بقيلي من ريحتها 

ابتسمت مني وردت بحب وهي بتطلع جهاز قياس الضغط من شنطتها :

ربنا يخليهولك يارب يا ماما الحاجة ،، يلا بقي نقيس الضغط قبل ما ناخد العلاج 

قاست مني الضغط لفريدة وكمان اديتها علاجها كله وكل ده وهما بيتكلمو وبيتساهرو سوا وفريدة كانت فرحانة اوي بمني ومرتاحالها ،، وشوية وهما بيتكلمو ق*طع كلامهم دخول ليان اللي اول ما شافتها مني اتصدمت وبصتلها بصدمة بس ليان مخدتش بالها وقربت منهم وهي بتقول بابتسامة :

هييييه ،،عرفت الاقيكي ،، شوفتي بقي انا شطورة ازاي 

استغربت فريدة وبصت لمني باستفهام فاتكلمت مني بقلة حيلة واحراج من الموقف اللي اتحطت فيه :

انا بعتذر لحضرتك يا ماما الحجة والله ،،دي اختي ليان اللي لسة قايلة لحضرتك عليها وانا جبتها معايا لانها مالهاش غيري ومينفعش اسيبها لوحدها في الشقه عشان زي ما حضرتك شايفة ليها ظروف خاصة 

بصت فريدة لليان وبعدين ابتسمت وقالتلها بحب :

مش لما ندخل علي حد لازم نسلم الاول يا ليان 

ليان بصت لفريدة شوية وبعدين قالت بسرعة وهي بتقرب من فريدة :

صح يا تيتة انا اسفة اوي 

فريدة سلمت علي ليان ورغم انها كانت مستغربة حالتها وطريقة كلامها بس حبت برائتها وحبت متحرجش مني وتتعامل عادي 

فبصت لليان وقالتلها بطيبة :

قوليلي يا ليان انتي عندك كام سنة  ؟

ليان بصت لايديها وردت وهي بتعد علي صوابعها :

انا عندي سنة وسنة وسنة ،، بصي انا عندي 9 سنين 

استغربت فريدة بس ردت بحنية وهي بتبص لليان بشفقة :

يا حبيبتي ،،ده انتي كبرتي خالص وبقيتي عروسة بقي 

كانت مني هترد بس قط*ع كلامهم صوت رعد العالي واللي كان واقف عند باب القوضة :

البنت دي ايه اللي طلعها هنا ؟،، مش معني اني وافقت انكم تقعدو يبقي تفتكرو البيت بيتكم وتسيبي اختك دي تتنتشر في كل مكان   

مني اتوترت وكانت هترد وتعتذر بس سبقتها ليان اللي اتفاجأ رعد بيها ب....يتبع 

↚

اتفاجأ رعد بيها وهي بتقرب منه وبتشاور قدام وشه وبتقوله بطفولة :

انت بتزعق لاختي وبتقولها الكلام الوحش ده ليه ،، فاكر نفسك مين ده انت حتي عمو طويل اوي وشكلك وحش اوي وانت مكشر كدة

اتصدم رعد من كلام ليان وقطعت كلامها مني اللي شخطت فيها وقالتلها بحد*ة وهي بتقرب منها:

ليااان ،، عيب كدة اللي بتقوليه ده ،، رعد بيه ده يبقي صاحب البيت اللي احنا فيه 

رعد بص لليان بحد*ة وكأنه متوقع انها تتصدم وتعتذر عن اللي قالته بس اتفاجأ بيها بتبصله بسخرية وبتتكلم بثقة :

وايه يعني يا ابلة مني ،، هو عشان صاحب البيت يزعقلنا كدة ،،اصلا انتي بتكدبي عليا عشان صاحبة البيت هي تيتة الحلوة اللي قاعدة هناك دي مش عمو الوحش ده 

ابتسمت فريدة بحب وهي بتتفرج علي اللي ليان عاملاه في رعد وفي نفس الوقت قاطعت كلامها مني قبل ما تتكلم وتلبخ في الكلام اكتر من كدة وقالتلها بعصبية :

ليااان ولا كلمة ذيادة واتفضلي علي الاوضه اللي قولتلك تقعدي فيها 

ليان كشرت بحزن وبصت لمني بزعل وبعدين مشيت بس قبل ما تمشي بصت لرعد وطلعتله لسانها وطلعت تجري علي برة ورعد اتصدم ورفع حاجبه باستنكار وهو باصص مكان ما كانت ليان واقفة وانتبه لصوت مني وهي بتقول باحراج وبتوجه نظرها بينه وبين فريدة جدته :

انا حقيقي اسفة جدا عاللي حصل من ليان انا بعتذر بالنيابة عنها ،، والله هي متقصدش لانها مش طبيعية زي حضراتكم شايفين،، اختي ليان بتعاني من مرض نفسي من وهي صغيرة بسبب مشاكل عائلية وده مخلي عقلها مش متقبل اللي حصل ووقف عند سنها وهي 9 سنين ،، انا عارفة ان حضراتكم  ملكوش ذنب في ده ،، بس هي مالهاش غيري ومدير المستشفي لما اعتذرتله صمم اني اجي وده لثقته فيا ،،اتمني انكم توافقو انها تقعد معايا لحد ما اخلص فترة العلاج بتاعة الهانم وهاخدها وهمشي علطول 

فريدة صعب عليها ليان وخصوصا لما حست ان قد ايه شبابها اتظلم وهي مخها مش فيها كدة فبصت لرعد برجاء وهو فهم نظرة جدته فنفخ بضيق ورد بجمود وهو بيسيبها وبيخرج :

تمام ،، بس ياريت تسيطري عليها شوية وتخليها تقعد في اوضتها اكبر وقت ممكن 

ابتسمت مني بفرحة وردت بلهفة وهي بتبص لفريدة بفرحة :

حاضر يا فندم اوعدك انك مش هتشوفها تاني 

خرج رعد من الاوضة ومني وقتها اتنهدت براحة وبصت لفريدة وهي بتقولها بامتنان :

انا بشكرك جدا عشان اقنعتيه انه يوافق ،،انا اخدت بالي لما شاورتيله  ،،حقيقي انا حبيتك اوي وانتي بالنسبالي في غلاوة امي الله يرحمها 

ابتسمت فريدة بحب و ردت بتلقائية وهي بتطبطب علي ايد مني :

انا عملت كدة عشان حبيتك انتي وليان اوي وحسيت انكم مني ده غير ان شقاوة ليان دي هتونسني اوي وهفتقدها بعدين ،، 

ابتسمت مني وردت بتنهيدة وهي بتبص لفريدة :

ليان دي كل حاجة ليا في الدنيا ،، ورغم اني اوقات لازم اقسي عليها عشان متأ*ذيش نفسها او اللي حواليها بس ببقي بعمل ده من ورا قلبي وبرجع اعاتب نفسي كمان اني ازاي اتعامل معاها كدة 

فريدة ابتسمت بفخر وبصت لمني وقالتلها بثقة :

انتي اجدع واحسن اخت في الدنيا ،،الاخت اللي تستحمل اختها وتراعيها في وقت تعبها تبقي بت اصول واهلها عرفو يربوها ،، بس لو مش هضايقك يعني ،،ممكن اعرف هي ليان حصلها كدة من ايه ؟،، ده لو مش هيضايقك 

ابتسمت مني بحزن وهي بتفتكر وبتراجع الزكريات وردت بهدوء وهي بتقعد قدام فريدة عالكرسي :

حضرتك بقيتي بالنسبالي حاجة كبيرة اوي ومعتقدش اني هزعل او اخاف احكيلك ،، انا هقولك كل حاجة .....

.........................

كانت قاعدة ليان في اوضتها وهي مكشرة وحزينة وباصة من الشباك اللي بيطل علي جنينة الڤيلا ،، كانت بت*شتم رعد في سرها عشان هو السبب في ان مني اختها تزعل منها وتزعقلها ،،فجأة لمحت رعد وهو خارج من باب الڤيلا فبصتله بغيظ وبصت من الشباك في الارض ووطت وخدت طوبة صغيرة من الجنينة وحدفتها جامد علي رعد اللي فجأة مسك راسه وهو بيتألم وبيبص وراه بغضب واول ما لمحته ليان وطت بسرعة عشان ميشوفهاش وكانت حاطة ايديها علي بؤها وبتضحك بصوت واطي عليه لحد ما فجأة شهقت بخضة اول ما لقت رعد مد ايده ومسكها من شعرها وهو واقف قدام شباك اوضتها فصرخت بو*جع وهي بتقول بسرعة :

ااه ،، انت بتمسكني ليه مش انا اللي حدفت عليك الطوبة 

رفع رعد حاجبه بصدمة وابتسم غصب عنه علي سذاجة ليان وكلامها اللي بيأكد انها هي اللي حدفت الطوبة عليه فحاول يمسك نفسه وقالها بغضب :

انتي عارفة انا ممكن اعمل فيكي ايه دلوقتي علي اللي عملتيه ده ؟،، عارفة ولا لا 

قال اخر كلامه بشخط خلي ليان تتنفض ودموعها تنزل بسرعة وهي بتقوله بتهتهة :

اانا اسفة والله مش هكررها تاني بس متقولش لابلة مني لو سمحت يا عمو 

رعد كان باصص لليان وهي بتعيط وحاسس بحاجة غريبة مقدرش يفسرها ،، حاجة خلته يهدي صوته ويقولها بهدوء :

خلاص متعيطيش مش هقولها،، بس متكرريهاش تاني  

ابتسمت ليان من بين دموعها وردت بلهفة وهي بتبص في عيون رعد :

بجد يا عمو ؟،، انا متشكرة اوي والله ،، 

كان مركز رعد اوي في عيون ليان العسلي وهي بتتكلم وفجأة انتبه ليها وهي بتشهق وبتبص علي كتفه وبتقول بخضة :

يا لهوووي ،،ده د*م ،، انت اتعو*رت يا عمو  

رعد بص علي كتفه وملس بايديه علي راسه مكان الضر*بة وكان في فعلا د*م فقال بلا مبالاه :

عادي ،، ده جر*ح بسيط هبقي اشوفه بعدين 

قال رعد كلامه وكان هيمشي بس اتفاجأ بليان بتمسك ايديه فلف وشه بسرعة وبصلها وبص لايديها اللي ماسكة ايديه وانتبه ليها بتقوله بلهفة :

لا طبعا ده جر*ح كبير اوي ،،استني يا عمو انا هعالجه ،،علي فكرة انا شاطره اوي وابلة مني علمتني لما اتعو*ر اعمل ايه عشان اخف ،،استني بس 

مستنتش ليان رعد يرد عليها باه او لاء وسابته وراحت ناحية دولابها وطلعت علبة اسعافات ورجعتله تاني ووقفت تبص لسور الشباك وبعدين قالت بضيق :

يوووه ،،لسة هلف من الباب ،،انا هنط استني بس يا عمو 

اتصدم رعد من كلامها وكمان لما شافها بتطلع عالكرسي وبتحاول تنط من الشباك وكان لسة هيتكلم ويمانع بس هي نطت وكانت هتقع فلحقها رعد ومسكها قبل ما تقع فشهقت ليان وغمضت عنيها بسرعة لما حست انها هتقع بس فجأة فتحت عنيها براحة وهي بتبص للارض ولقت نفسها مرفوعة فوق وكان رعد شايلها بصتله شوية وهو كان مركز في عنيها اوي وهي فجأة ابتسمت وقالت ببرائة :

شكرا يا عمو انا كنت هقع 

انتبه رعد لنفسه ونزل ليان وهي بصتله بحيرة وبعدين قالت وهي بتبص بعيد في الجنينة :

انت طويل اوي وانا مش هطول راسك ،، بص تعالي اقعد عالمرجيحة دي وانا هعالجك ماشي 

رعد ميعرفش ليه كان مطاوعها وساكت ومش بيعترض علي اي حاجة بتقولها ،،كان حاسس انه اسير عندها ومش قادر يعترض ،، كان متابعها وهي بتعالج جر*حه وسرحان في تفاصيل ملامحها لحد ما انتبه ليها وهي بتسقف وبتقول بفرحة :

هييييه ،، انا خلصت ،، شوفت بقي مش قولتلك شطورة انا 

رد رعد وهو بيقوم من مكانه وقالها بجدية وكأنه اتحول ورجع تاني رعد القديم :

اعتبريه عقاب ليكي عشان انتي اللي عملتي الجر*ح ده ،، ولو اللي حصل اتكرر تاني ،،هخليكي تقعدي في الشارع انتي واختك 

قال رعد كلامه وساب ليان ومشي وكانت متابعاه هي بضيق من طريقة كلامه معاها وقالت باندفاع :

طب يارتني ما عالجت الجر*ح بتاعك ،، هه 

.....................

معقولة اللي بتقوليه ده يا مني يا بنتي ،، بقي في اب يعمل كدة في بنته 

قالت كدة فريدة وهي بتبص لمني ومش مصدقة اللي سمعته منه ،، ومني ابتسمت بسخرية وردت بحزن وهي بتفتكر :

لا صدقي يا ماما الحاجة ،، بابا عاش عمره كله بيفرق بينا في المعاملة ،، عمري ما افتكر ولو مرة واحدة انه كان بيعامل ليان كويس ،، كان دايما بيقسي عليها ودايما بيطلعها غلطانة حتي لو كنت انا اللي غلطانة ،، كانت تعيط كتير وتقعد تسألني ليه بابا بيعمل معايا كدة لحد ما اتخطبت ليان لرامي وده يبقي ابن عمي وكانت مغصوبة عليه من بابا ،، انا حاولت كتير اخليه يصرف نظر عن الجوازة دي بس كان بيعند ذيادة وفي اليوم اللي كان السبب في ان ليان توصل للحالة اللي انتي شوفتيها دي ،، لقيتها راجعة البيت منهارة من العياط واتفاجأت بيها  انها بتقولي .......يتبع

↚

قالتلي انها شافت رامي مع واحدة وفي الشارع وماسكين ايد بعض وقعدت تتكلم كلام معظمه مش مفهوم،، زي ليه بيحصل معاها كدة ،،ليه كل اللي حواليها بيكر*هوها ،، ليه لما بتدي الامان والثقة لحد بيخو*نوها ،، كانت صعبانة عليا اوي ،،حاولت اواسيها وفضلت جنبها بس بابا الله يرحمه ويسامحه دخل علينا وقالها ان رامي كلمه وقاله اللي حصل وان الجوازة هتم غصب عنها وانه عايز يخلص منها وكلام كتير يو*جع 

دمعة نزلت من عيون فريدة شفقة علي ليان واللي اتعرضت ليه ،،كانت صعبانة عليها لدرجة انها كر*هت ابوها اللي كان السبب في كل ده،، لما فرق  في المعاملة بين بناته وانتبهت لمني اللي كملت وهي بتمسح دموعها :

وبعد كلام بابا سابت ليان البيت ومشيت وهي حالتها صعبة وللاسف وهي بتجري في الشارع عملت حادثة وعربية خب*طتها ودخلت في غيبوبة قعدت فيها شهر ولما فاقت كانت زي ما انتي شايفة ،، الدكتور قالي ان عقلها الباطن رافض يفتكر اي حاجة من اللي حصلت ليها ومن خوفها قررت تعيش في زمن معين 

فريدة طبطبت علي مني بشفقة وقالت بتنهيدة :

ده نصيب يا بنتي وقدر ومكتوب ،، ان شاء الله مسيرها تخف وترجع احسن من الاول 

رفعت مني عنيها للسما ورددت بامل وثقة في الله :

يارب اللهم امين ،، معلش دوشتك ،، هسيبك تريحي بقي واطلعلك في معاد العلاج 

ابتسمت فريدة بحب وردت بنفي وهي بتبص لمني بحب :

بالعكس ،، ده انتي خلتيني احس بطعم الحياه ،، انا كنت خلاص من كتر اليأس بقيت اقول امتي اموت 

ردت مني بلهفة وهي بتبص لفريدة بحزن :

لا طبعا بعد الش*ر عليكي  ،، ان شاء الله تبقي كويسة جدا وانا مع حضرتك ومش هسيبك الا لما تكوني بخير ،، يلا هسيبك تريحي

..........................

عدي اسبوع كانت فيهم مني مسيطرة علي ليان ومش بتخليها تخرج خالص من اوضتها عشان ميحصلش مشاكل مع رعد وليان كانت دايما مخنوقة وزهقانة وكانت قاعدة عند الشباك وباصة للزرع بحزن واول ما شافت رعد داخل من بوابة الڤيلا ابتسمت بتلقائية وهو نزل من عربيته وبعدين عينه راحت بتلقائية علي شباك اوضة ليان زي كل يوم بس المرادي كان مفتوح وشافها واقفة بتبتسم ليه ،، شبح ابتسامة ظهرت علي وشه وهو باصص ليها وفجأة لقاها بتشاورله وبتقوله تعالي ،، وقف شوية وبعدين لقي نفسه بيقرب عليها واول ما راح عندها قالتله ليان بابتسامة جذابة :

ازيك يا عمو الوحش 

رفع رعد حاجبه باستنكار وقال بتلقائية :

وحش ؟،، طب ولازمتها ايه عمو 

ليان فكرت شوية وبعدين شاورت بايديها لرعد وهي بتقوله بهمس :

هات ودنك اقولك علي حاجة سر 

كشر رعد باستغراب بس طاوعها وقرب منها فقالتلها ليان بهمس :

ممكن تكلم ابلة مني وتخليها تخرجني ،،احسن انا زهقانة اوي ومش بروح في حتة خالص ،، يرضيك افضل كدة ؟

ابتسم رعد ورد بشماتة وهو بيبعد عن ليان :

طبعا يرضيني ،،ده احسن حاجة عملتها اختك 

كشرت ليان وبصت لرعد بعتاب وزعل ودورت وشها وقالتله بضيق :

خلاص امشي انا مش عاوزة منك حاجة ،  انا كنت مفكراك صاحبي بس طلعت وحش فعلا 

كانت هتسيبه ليان وتبعد بس رعد لحقها وهو بيقولها بخبث :

ولو خليتها تسيبك تخرجي هتعملي ايه 

لفت ليان بسرعة وعلي وشها ابتسامة واسعة وردت بلهفة :

مش هعمل حاجة وحشة خالص انا هلعب هنا في الجنينة ،،خليها تخرجني بقي 

رعد ابتسم بهدوء ورد عليها وهو بيتصنع الجدية :

تمام هقولها واخليها تخرجك  

قال رعد كلامه وكان هيمشي بس اتفاجأ بليان بتقوله بحماس :

وانت هتنزل تاني تلعب معايا مش كدة ،، انا اعرف لعبة حلوة اوي هتعجبك 

رعد لف وشه وبص لليان شوية فابتسمت ليه ببراءة بس رعد رد بجمود وهو بيسيبها ويمشي :

لا انا مبلعبش 

كشرت ليان بتذمر وهي بتبص علي رعد وبعدين رجعت سقفت بحماس لانها اخيرا هتخرج 

............................

كانت ليان بتلف حوالين نفسها في وسط الجنينة بعد ما مني قالتلها ان رعد طلب منها انها تخرجها شوية وكان رعد متابع ليان وهي بتلعب وبتلف حوالين نفسها وكان حاسس انه متشتت كان عقله مشغول باللي حصل معاه الاسبوع اللي كانت ليان فيه مبتخرجش وازاي كان هو متعصب وكان بيفكر فيها ،، استغرب نفسه وهو كل يوم يبص عالشباك علي امل انها تكون فاتحاه وواقفة فيه ،، افتكر لما كان هيقع بلسانه ويسأل مني عليها بس مسك نفسه في اخر لحظة ، لعن نفسه عشان المشاعر دي كلها وكان بيسأل نفسه اشمعني البنت دي اللي حصله معاها كدة  ،، انتبه رعد لليان وشبح ابتسامة ظهرت علي وشه لما شافها بتجري ورا فراشة بس ابتسامته اختفت اول ما شاف ايمن ابن عمه بيقرب منها وبيتكلم معاها ،،قبض علي ايده بغضب وهو شايفه بيتكلم معاها وشاف ليان وهي بتسيبه وبتمشي بس هو مسك ايديها عشان متمشيش وهنا رعد بصلهم بغضب وخرج بسرعة من اوضته عشان يروحلهم ،، في نفس الوقت كانت ليان بتبص لايمن بخوف وبتقوله :

ممكن تسيبني يا عمو لو سمحت ،، انا قولتلك اني معرفش انت عايز مين 

ابتسم ايمن باعجاب وهو بيبص لليان من فوق لتحت بتقيم وقال بسخرية :

عمو!! ،، عمو مين يا حلوة بس ،، انا اه اكبر منك بس مش بكتير اوي كدة ،، بس اقولك انتي تقولي اي حاجة انا موافق 

حاولت ليان تشد ايديها من ايد ايمن وكانت خايفة من طريقة كلامه ونظراته ليها واللي خوفها اكتر انه مش راضي يسيبها بس اتفاجأت برعد بيتدخل وبيشدها من 

ايديها وبيخبيها وراه وهو بيتكلم :

خير يا ايمن ،، ليه الزيارة الكريمة دي يعني ؟

ليان كأنها ما صدقت لقت رعد بمسكت في هدومه وخبت نفسها ورا ضهره وحس رعد بيها وكان فرحان ميعرفش ليه بس انتبه لايمن اللي رد بسخرية وهو بيحاول يبص لليان اللي مستخبية في رعد :

عادي يا ابن عمتي ،، انا قولت اجي اطمن علي تيتة ،، مش هي جدتي انا كمان برضه ولا ايه 

عينك في وشي انا يا ايمن والزم حدودك واحترم البيت اللي انت فيه 

قالها رعد بحد*ة وهو باصص لايمن اللي بيحاول يشوف ليان واضايق من كلام رعد ليه وتهد*يده فقال بابتسامة مزيفة :

طيب هي مين الامورة دي يا رعد باشا ؟

ضيفة وشئ ميخصكش يا ايمن  ونينة فوق تقدر تطلعلها ويابخت من زار وخفف هه 

ايمن اتعصب ورد ببرود عكس اللي جواه :

الكلام ده لو لحد غريب لكن انا هنا في بيت جدتي مش في بيتك يا ابن عمتي 

قال ايمن كلامه وسابه ودخل الڤيلا وكان متابعه رعد بغضب وبعدين لف وبص لليان اللي كانت دموعها متجمعة في عنيها ولاقاها بتقوله بخوف :

عمو ده وحش اوي ،، مكنش عايز يسيبني يا رعد 

رعد قلبه فجأة دق وكأنه اول مرة يحس بدقاته من كتر ما بيدق جامد ،، كان بيسمع اسمه منها لاول مرة من غير عمو وكان اسمه ليه احساس تاني خالص بصوتها ،، اتنحنح رعد ورد بهدوء :

متخافيش ،،مش هيضايقك تاني ابدا ،، انا هعلمه الادب 

ابتسمت ليان وردت بتلقائية وبراءة عصفت بيها كيان رعد لتاني مرة :

انا اطمنت لما انت جيت يا رعد وخلاص مبقتش خايفة ،، انا بعد كدة هقولك رعد بس وانت قولي ليان بس عشان بقينا اصحاب ،، اتفقنا 

قالت ليان كلامها الاخير وهي بتمد ايديها لرعد اللي كان باصص لايديها ورجع بصلها ورد بهدوء وهو بيمد ايده ويسلم عليها :

  اتفقنا 

..........................

خب*ط ايمن ودخل علي جدته بعد ما اذنت ليه وكانت مني قاعدة معاها بتعملها علاج طبيعي ويدوب كانت لسة مخلصة ،، دخل ايمن وهو بيبتسم وبيقول بصوت عالي :

وحشتيني يا فيفي يا قمر ،،لا بس صحتك جت عالعُمرة اهو 

ابتسمت فريدة وهي بتبص لايمن وبتقوله بحب :

يا واد يا بكاش ،، طول عمرك وانت اونطجي ،، وبعدين لسة فاكر انك ليك جدة تسأل عليها 

ابتسم ايمن باحراج ورد بتهرب وهو پبص لمني بفضول :

منا كنت مسافر يا فيفي ولسة راجع من يومين ،، الا مين اللي انا عمال اشوفهم في الڤيلا دول ،،انتو قلبتوها لوكاندة ولا ايه 

اتحرجت مني واستأذنت هي وخرجت تحت نظرات ايمن وفي نفس الوقت ابتسمت فيفي وردت :

دي الممرضة بتاعتي يا ايمن بتابع علاجي وبتعملي جلسات لضهري  ،، المهم انت عامل ايه وامك اللي مفكرتش تسأل عني عاملة ايه 

ابتسم ايمن بتوتر ورد بسرعه وهو بيقوم وبيعدل هدومه :

كويسة يا نينة ،، المهم بقي هتأكلوني ايه ،،احسن انا قررت اقضي اليوم معاكم عشان بقالي كتير مجتش وشكلي كدة هقيم هنا علطول ،، قال كدة ايمن وهو بيفكر في حاجة وناوي ينفذها   ......يتبع  

↚

ابتسمت فريدة بحب وردت بفرحة 

وهي بتبص لايمن برجاء :

ياريت يا حبيبي ،، تنور وتأنس ،،والله يا ايمن ده اللي كان نفسي فيه ،،انك انت ورعد تبقو صحاب واخوات وتقفو جمب بعض كدة ،، انتو ملكوش الا بعض يا حبيبي 

ابتسم ايمن بسخرية وهو بيبص بعيد ورجع رسم ابتسامة مزيفة علي وشه ورد بطاعة :

طبعا يا حبيبتي هيحصل متقلقيش ،، المهم يلا بقي عشان تنزلي تقعدي معايا عالسفرة تحت ،،انا مش هاكل من غيرك 

فرحت فريدة بكلام ايمن ودعت ربنا ان قلبه يحن لرعد ويرجعو صحاب من تاني بس هي مكنتش تعرف اللي من جوا ايمن ايه من ناحية رعد 

................ 

كان قاعد رعد عالسفرة وبيبص لفريدة جدته بحب وفرحة في نفس الوقت لانها بدأت تتحسن وده لاحظه عليها وكان قاعد جمبه ايمن اللي كان بيبص للاكل وبيبتسم وبيقول بسعادة :

دي كل الاصناف اللي انا بحبها ،، اكيد انتي يا فيفي اللي وصيتي عشان يتعملي الاكل الجامد ده 

ابتسمت فريدة وطبطبت علي ايد ايمن وهي بتقوله بحنية :

طبعا يا حبيبي هو انت بتيجي كل يوم 

ايمن بص بعيد وابتسامته وسعت وهو بيقول بخبث :

لا منا شكلي كدة هاجي فعلا كل يوم 

بص رعد لايمن باستغراب لانه مش بعادته انه يجي فعلا زي ما هو بيقول بس فجأة ملامحه اتغيرت اول ما بص بعيد ما كان ما ايمن بص ولقي ليان جاية عليهم وهنا فهم رعد قصد ايمن وقبض علي ايديه بغضب ،، قربت ليان وهي بتبتسم وقالت بفرحة وهي بتقعد جمب رعد  :

ازيكم ،، ازيك يا رعد يا صاحبي 

ضحكت فريدة علي جملة ليان وايمن بصلهم بغموض وبعدين قال بسخرية :

ايه ده انت بقيت بتصاحب عيال يا ابن عمتي ولا ايه ؟

بصله رعد بحد*ة ورجع بص لليان وقالها بزعيق :

انا مش صاحب حد ،، ثم انتي ايه اللي جابك هنا ،، انتي مش ليكي مكانك اللي بتقعدي فيه ،،ايه اللي خرجك من اوضتك 

اتنفضت ليان وقامت بسرعة وخوف من صوت رعد اللي كانت بدأت تحبه وتعتبره صديقها خصوصا بعد ما دافع عنها بس دلوقتي تصرفاته وزعيقه ليها خلاها تبصله بصدمة وخوف واحساس قبض قلبها وخلي ذكريات تيجي في دماغها فجأة وصور غريبة تظهر قدام عنيها فحطت ايديها علي ودنها بخوف وحيرة وبقت تعيط بهستيريا وكأنها دخلت في نوبة غريبة ورعد لاحظ ده وشكلها خلي قلبه يو*جعه عشانها  فسكت وكان هيقرب ويعتذر بس ليان رجعت لورا بخوف منه وفي نفس الوقت كانت مني جاية وسمعت كل حاجة فجريت علي ليان وخدتها في حض*نها وبصت لرعد وكلمته لاول مرة بحد*ة من غير ما تعمل حساب هو مين :

انا اختي مغلطتش يا رعد بيه ،، جدتك اللي طلبت مننا نتغدي معاكم واختي خرجت بناء علي طلبها هي ،، وانا مش عشان بشتغل هنا فهسمح ان اختي تتهان بالطريقة  دي حتي لو منك ،، ده اخر يوم لينا وانا همشي بكرة الصبح وهبلغ المستشفي تبعت حد غيري ،،

قالت مني اللي قالته وخدت ليان اللي كانت في حض*نها وبتعيط بهسيتريا ،، خدتها ودخلو اوضتهم وكان متابعهم رعد بغضب بس من نفسه واندفاعه بالطريقة دي ،، وايمن كان واقف بيتابع كل حاجة وبيبتسم بسخرية وخبث وعقله شغال تفكير وتخطيط ،، انتبه رعد لصوت جدته اللي قالتله بعتاب :

ليه كدة يا رعد يابني ،، ليه تعمل كدة وتزعق للبنت بالطريقة دي وانت عارف انها مش في عقلها ،، والله انا اللي طلبت منهم يطلعو ياكلو معانا عشان مياكلوش لوحديهم واهو نتلم كلنا واحس ان في ونس ،، لازم تصلح اللي عملته يا رعد انا مش عايزة مني تمشي وتاخد ليان معاها ويسيبوني بعد ما بقيت احس ان ليا عيلة وونس واني مش لوحدي في الڤيلا الطويلة العريضة دي 

نفخ رعد بضيق وهو بيسمع كلام جدته وقام بهدوء خد بعضه وسابهم وطلع علي اوضته وكانت متابعاه فريدة بحزن وانتبهت علي صوت ايمن اللي قرب منها وسألها بهمس وهو بيبصلها بفضول :

الا قوليلي يا تيتة،، ايه قصة البت اللي بتتكلم زي العيال الصغيرة دي ؟

اتنهدت فريدة بحيرة وبعدين بصت لايمن وقالتله بحزن:

هحكيلك يا ايمن يا حبيبي 

........................

تاني يوم كانت واقفة مني بتشيل حاجتهم من الدولاب في الشنطة بتاعة السفر اللي كانت محطوطة عالسرير وشوية وبصت لليان اللي كانت قاعدة عالسرير وضامة رجليها لحضنها وساندة دماغها عليها وباصة للشباك وسرحانة ،، كانت حاسة مني بحزن وتأنيب ضمير وانها السبب فيمو،كؤ  اللي حصل لليان اختها ،، مسحت دمعة نزلت من عنيها وانتبهت لخب*ط الباب فسابت الهدوم اللي في ايديها وراحت تفتح و اتفاجأت برعد قدامها ،، بصتله بصدمة وتوتر وبصت وراها لليان ورجعت انتبهت ليه وهو بيقولها بهدوء :

ممكن تسمحيلي ادخل ؟

اتوترت مني وردت بتردد وهي بتشاور بجدية لرعد يدخل :

طبعا يا رعد بيه ،، ده بيتك اتفضل 

دخل رعد وهو  عنيه علي ليان اللي كانت في عالم تاني وباصة الناحية التانية وحقيقي شكلها كدة كان صعب،، فقلبه و*جعه عليها ولف وبص لمني وقال بجدية :

انا جيت دلوقتي عشان اعتذر عن اللي حصل امبارح ،، انا اسف واتمني انكم تقبلو اعتذاري وتقعدو متمشوش 

مني كانت واقفة مصدومة ،، وكل اللي شاغل عقلها ان رعد بيه يعتذر وكمان يجيلهم لحد عندهم اوضتهم عڜان يعتذر !! ،،

 اتنحنحت وردت مني بجدية :

اانا مش عارفة اقولك ايه يا رعد بيه ،، اعتذارك مقبول بس ليان رافضة انها تقعد وكانت مصممة اننا نمشي امبارح لولا اني هديتها وقولتلها هنمشي الصبح 

لف رعد وبص لليان وقرب منها ووقف قدامها ولاول مرة ينطق اسمها علي لسانه لدرجة ان قلبه دق وهو بينطقه :

لياان 

ليان انتبهت لصوت رعد وبصتله وفجأة بقت تتتفض ورجعت لورا بخوف وهي بتبصله وده خلاه يل*عن نفسه اكتر وخصوصا انها كانت بتثق فيه اوي وكانت بتعامله الاول علي انه صديقها ،، قرب رعد من ليان وقعد علي حرف السرير وقالها بسرعة :

انا اسف يا ليان ،، مكنتش اقصد اني ازعقلك ،،حقيقي اسف ،، ياريت نرجع صحاب تاني ؟

ليان كانت بصاله والدموع في عنيها :

لا ،، انت وحش ،،انا كنت فاكراك بتحبني واني صاحبتك زي ما انا حبيتك واعتبرتك صاحبي ،، انت خلتني اخاف يا رعد ،، انا مكنتش بخاف منك بس انت خلتني اخاف اوي 

رعد غمض عنيه بعن*ف وضغط علي شفايفه جامد وبعدين فتحها وقال بابتسامة :

خلاص سامحيني المرادي بس وانا اوعدك اني مش هزعلك تاني ابدا واني دايما هكون صاحبك،، بس متمشيش وتسيبيني 

قال رعد جملته الاخيرة بصدق حسيته ليان في صوته ونظرة عنيه ليها وكمان مني اللي كانت واقفة مش متخيلة ان رعد اللي شخصيته معروف عنها انها حا*دة وجادة بيتعامل مع اختها بالطريقة دي فكانت بتبصله باستغراب اوي وكانت متابعة اللي بيحصل بين رعد وليان بصدمة ،، ليان كانت باصة لايد رعد الممدودة ليها بعد كلامه اللي فرح قلبها ولقت نفسها بتبتسم ابتسامة واسعة انعشت بيها قلب رعد وهي بتمد ايديها في ايديه وبتقوله بموافقة :

خلاص سامحتك ،، انا اصلا مكنتش همشي علطول ،،كنت هرجع تاني علي فكرة 

رعد ابتسم مرة واحدة وقالها وهو بيسندها عشان تقف :

طيب يلا بقي تعالي عشان عاملك مفاجأة هتعجبك اووي 

بصت ليان لمني وهي بتقول بفرحة وبتشاور علي نفسها :

ايه ده مفاجأة ليا انا ،،بجد يا رعد 

رعد ابتسم بجاذبية وقالها وهو بيحرك راسه بموافقة :

طبعا بجد ،، يلا تعالي معايا 

بصت ليان لمني وكأنها بتاخد اذنها وبتسألها بعنيها تروح ولا لا وفهمت مني كدة وابتسمت وحركت راسها بيجابية لليان خصوصا بعد ما شافت الفرحة في عنيها 

مسكت ليان ايد رعد اللي اتوتر وهو باصص لمني واتنحنح بجدية واخد ليان وخرج من الاوضة والڤيلا كلها 

......................

كان قاعد في اوضته وهو بيتكلم مع مني في التليفون :

وحشتيني 

ابتسمت مني بخجل وردت علي وائل بتوتر :

احم ،، اخبارك ايه ،، انا عارفة اني مقصرة معاك بس حقيقي غصب عني 

وائل ضحك بصوت عالي ورد علي مني وهو بيملس علي شعره باحراج :

رغم انك بتهربي بالكلام بس ماشي مسيرك هتيجي ووقتها بقي استلقي وعدك 

ابتسمت مني بخفة وردت بتنهيدة وهي بتفتكر اللي حصل مع ليان ووائل حس انها فيها حاجة متغيرة فقالها بقلق :

مالك يا حبيبتي ،، شكلك مضايقة ،،في حاجة حصلت ،، طمنيني عليكي 

كانت مني مترددة تتكلم وتحكي عن اللي حصل معاها ومع ليان من رعد خوفاً من رد فعل وائل بس حاولت تتشجع بس قبل ما تتكلم اتفاجأت بيه بيقولها ........يتبع   

↚

الموضوع بخصوص رعد ابن الست اللي انتي بتمرضيها مش كدة ؟

اتصدمت مني وردت بتلقائية وهي فاتحة بؤها من الصدمة :

ايه ده عرفت منين يا وائل ؟

ابتسم وائل علي سذاجة مني ورد بحب وهو بيتنهد :

ابدا يا ستي ،، اصل انا معجبنش طريقته في الكلام معاكي اول مرة شوفناه فيها وبصراحة حسيته مغرور كدة في نفسه وتوقعت انه هيضايقك بغروره ده 

ابتسمت مني اول ما فهمت السبب وردت بتلقائية :

بصراحة انت عندك حق هو الموضوع فعلا يخص رعد بس مش زي ما انت فاهم خالص 

كشر وائل باستغراب وسأل مني بقلق وهو بيتعدل في قاعدته :

اومال ايه الموضوع يا حبيبتي ،،اتكلمي ،، قلقتيني  

ابتسمت مني بحب وردت عليه وهي بقعد عالكرسي في جنينة الڤيلا :

مفيش حاجة يا وائل ،، بس حقيقي محتارة اوي ومش عارفة اذا كان اللي بعمله ده صح ولا غلط 

كشر وائل باستغراب واتكلم بهدوء وحنية في نفس الوقت رغم قلقه احسن يكون الموضوع كبير   :

قوليلي يا حبيبتي مالك وانا اشور عليكي ،، يمكن رأيي يفيدك برضه 

اتنهدت مني بحيرة وبعدين حكت لوائل كل حاجة حصلت من يوم ما قعدو في الڤيلا لحد المشكلة اللي حصلت بين ليان ورعد واعتذاره ليها وكملت كلامها وقالت بتنهيدة :

انا بس حاسة ان ليان مبسوطة وهي عمرها ما كانت سعيدة كدة ،، بحس انها معتبرة رعد بيه صديقها الوحيد وهو كمان طريقته غريبة معاها ،،مش قادرة احدد دي شفقة ولا خبث ولا ايه بالظبط وخايفة اني اسيبها تعيش شوية وتفرح فقلبها يتجر*ح 

اتنهد وائل ورد بجدية علي مني خلاها تقوم من مكانها وهي مصدومة لما لقته بيقولها :

دي حاجة واضحة زي الشمس يا مني ،، ايه اللي يخلي واحد مغرور زي رعد ده يتغير في معاملته مع بنت زي ليان وكمان في ظروفها اللي كلنا عارفينها ،، وكمان يدخل ويعتذرلها عشان تقعد ومتمشيش الا اذا كان حبها 

مني مكنتش مستوعبة كلام وائل وردت بتلقائية وهي بتردد كلمته :

حبها ،، انت بتقول ايه يا وائل بس ،، رعد بيه يحب ليان اختي ،،انت بتتكلم ازاي بس 

مكنتش مني الوحيدة المصدومة بكلام وائل ،، كان ايمن كمان مصدوم وهو بيسمعها من بعيد شوية ومش مصدق ان رعد يحب البنت المجنونة دي وفجأة ابتسم بخبث وهو بيدخل تاني الڤيلا وفي دماغه الف فكرة ،، اما مني فردت بخوف وهي بتقعد تاني عالكرسي :

طيب والحل يا وائل ،، انا مش عارفة اذا كان اللي بتقوله ده صح ولا لاء ،،دي كلها احتمالات وبعدين هو اصلا شخصيته غير لياان خالص ،، وازاي اصلا ،، لالالا يا وائل ،، اكيد مش زي ما انت فاهم 

وائل اتنهد بحيرة وبعدين قالها بهدوء وهو بيفهمها تعمل ايه :

خلاص يا مني ،،انتي متعمليش حاجة ،، بس خدي بالك علي ليان كويس وعينك عليها وسيبي الموضوع ماشي زي ما هو كدة وكل حاجة هتتعرف مع الوقت ومشاعره هتبان 

حركت مني راسها بايجابية ووافقت علي كلام وائل وقررت تعمل بنصيحته وقفلت معاه وهي بتفكر في ليان وانها لو كانت بعقلها يمكن كانت كل حاجة اختلفت ،، قط*ع كلامها دخول ليان مع رعد في عربيته واول ما شافت مني صرخت بفرحة ونزلت بسرعة وحض*نتها وهي بتقولها بفرحة :

ابلة مني ،،وحشتيني اوي ،، شوفتي رعد جابلي ايه وتعرفي ده وداني الملاهي ولعبنا كتير اوي سوا ،، بجد انا بحبه اوي 

اتصدم رعد من اللي قالته ليان واعترافها بحبه وبص لمني بتوتر وهي كمان بصتله بتردد وحيرة وبعدين بصت لليان وهي بتقول بابتسامة :

المهم انك اتبسطي يا ليان ومبقتيش عايزة تمشي مش كدة ؟

ليان رجعت مسكت ايد رعد بتلقائية وهي بتقول بثقة :

انا مش همشي واسيب رعد ابدا ابدا مش كدة يا رعد ،، انت كمان مش هتسيبني صح ؟

اتوتر رعد اكتر وساب ايد ليان وهو بيقول بجدية مصطنعة :

انا بقول تروحي تنامي بقي يا ليان عشان تعبتي من اللعب ، تصبحو علي خير 

مشي رعد تحت نظرات مني الحيرانة وليان السعيدة اوي بوقتها اللي قضته مع رعد وبعد كدة مني اخدتها ودخلت وهي بتتكلم معاها عن تفاصيل وقتها مع رعد وكلامه معاها 

..........................

في الڤيلا كان طالع رعد عالسلم وهو من جواه سعيد اوي بوقته اللي قضاه مع ليان وكان مبتسم وهو بيفتكر وقتهم سوا بس اتفاجأ بايمن وهو واقف علي اول السلالم من فوق ومربع ايديه وبيبتسم بسخرية وهو بيقوله :

لا بس باين الخروجة كانت حلوة اوي عشان كدة جاي مزاجك عالي ورايق 

رعد بصله بحد*ة ومتكلمش واتجاهله وسابه ومشي بس رجع وقف مرة واحدة اول ما سمع ايمن بيقول :

لا بس بصراحة ذوقك المرادي حلو اوي ،، اينعم عقلها مهوي بس جامدة 

ملحقش ايمن يكمل كلامه لما رجع رعد ليه بسرعة وفجأة مسكه من رقبته وقاله بتهد*يد وهو بيهمس ليه :

انا مبحبش اعيد كلامي مرتين وانت عارفني ومجرب قلبتي يا ايمن فاتقي شري عشان انت متعرفش لسة رعد التهامي ،، ليان لو فكرت وسرحت بخيالك فيها انا همحيك من الوجود وزي ما قولتلك مش بعيد كلامي مرتين 

اتنفس ايمن وبقي يكح بسرعة وهو بينهج بعد ما سابه رعد وبعد عنه فجأة ومشي ووقتها ايمن كان باصص علي رعد وهو ماشي وبيتوعدله وهو مش قادر ياخد نفسه 

........................

يا نهار اسود ،، ايه اللي بتقوليه ده يا ليان ،، انتي عايزة تسيبيني وتعيشي هنا مع رعد وعادي كدة عايزاني اسيبك ؟

قالت كدة مني بغيظ وهي بتبص لليان ومكشرة وليان كانت هي كمان مكشرة وردت وهي بتربع ايديها بزعل :

وانا اعمل ايه طيب يا ابلة مني ،، انتي اللي عايزة تمشي من هنا وبتقوليلي مش هنيجي تاني ،، خلاص امشي انتي 

ردت مني بزعل وهي بتبص لليان بعتاب علي كلامها :

اخس عليكي يا ليان ،، بقي دي اخرتها ،، عايزة تبعدي عني واسيبك هنا وامشي ،، انا زعلانة منك 

ملامح ليان لانت وهي باصة لمني بحزن وقربت منها وخدتها في حض*نها وهي بتقولها ببراءة :

خلاص طيب متزعليش يا ابلة مني انا اسفة ،،انا همشي معاكي بس هخلي رعد هو اللي يجي معانا ويجيب تيتة كمان 

اتصدمت مني من كلام ليان وسألتها باندفاع وهي بتبصلها بصدمة :

للدرجادي رعد ده بقي مهم بالنسبالك يا ليان ؟

ليان بصت لمني بحزن وردت بتلقائية وكلام متعرفش طلع منها ازاي وعشان كدة خلي مني عنيها دمعت وقلبها و*جعها :

اصله هو الوحيد اللي حبني يا ابلة مني وعايز يبقي صاحبي ،، وكمان بيحميني انتي شوفتي انقذني ازاي من عمو الوحش 

مني اتأثرت بكلام ليان وخدتها في حضنها وعيطت واتمنت لو تكون ليان بعقلها وتعيش سنها الحقيقي يمكن وقتها يكون فعلا في امل بينها وبين رعد 

.........................

عدي شهر كانت حالة فريدة اتحسنت جدا عن الاول والعلاج الطبيعي جاب نتيجة وبدأت فعلا تتحرك لوحدها وكانت في الفترة دي علاقة رعد بليان اتوثقت اكتر وبقو الاتنين يهزرو سوا قدام الكل وكانت فريدة سعيدة بده اوي خصوصا ان رعد لاول مرة من فترة طويلة يضحك وتشوفه مبسوط كدة وكمان يقعد في البيت او لما بيروح الشغل بيرجع بدري وكل ده عشان ليان دخلت حياته وغيرتها كدة ،، اما مني كانت فرحانة برضه عشان ليان لانها بعد ما كانت منطوية وخايفة ومش بتتكلم مع حد بقت نشيطة وحابة الحياه اوي بس علاقتها برعد ده اللي كانت خايفة منه مني وخصوصا ان مشاعره بدأت تظهر اكتر ليها من معاملته لليان قدامهم وانهاردة كان قاعد رعد في مكتبه بيشتغل ومركز فيه لحد ما خ*بط الباب وسمع صوت مني وهي بتقول بهدوء :

ممكن اتكلم مع حضرتك شوية يا استاذ رعد ؟

رعد قام بسرعة وقرب من الباب وفتحه وهو بيقول لمني بلهفة :

خير يا مني في حاجة ،، ليان كويسة ؟

بصتله مني باستغراب واتأكدت شكوكها ناحيته وهو لاحظ ده فقالها بتوتر :

ااقصد نينة وليان كويسين ؟

حركت مني راسها بايجابية وردت بهدوء وهي بتبص لرعد :

ايوة كويسين ،،انا بس كنت محتاجة اتكلم معاك في موضوع كدة يخص ليان اختي 

ابتسم رعد بتوتر وشاورلها علي كرسي مكتبه عشان تقعد وقالها بهدوء :

طبعا اتفضلي وفي اي وقت احتجتيني متترديش لو سمحتي 

ابتسمت مني وردت بابتسامة وهي بتقعد عالكرسي :

متشكرة ،، ياريت تقفل الباب لاني مش حابة حد يسمع كلامنا ولا حتي ليان 

قفل رعد الباب وقرب هو كمان وقعد علي مكتبه وهو بيقول لمني بتردد:

اتفضلي انا سامعك 

كان رعد بيقول كلامه وهو باصص لمني بابتسامة خلتها تتشجع وتاخد نفسها وتتكلم و اتفاجأ بيها بتقوله باندفاع .....يتبع 

↚

ممكن اعرف انت عاوز من اختي ايه ؟

قالت كدة مني بحيرة وغموض وهي باصة في عيون رعد يمكن تفهم منه السبب اللي مخليه بيعامل ليان عكس كل الناس وهنا قام رعد من علي كرسي مكتبه ورد بتوتر وهي بيلف وبيقرب من مني :

انتي تقصدي ايه باني عايز ايه من ليان ؟ هي اشتكتلك مني ؟

مني ردت بحزن وخوف اتغلبه علي صوتها :

بالعكس ،،اختي اتعلقت بيك ومعتبراك اهم شخص في حياتها وليان عمرها ما اتعلقت بحد كدة خصوصا بعد حالتها دي ،، ارجوك قولي انت عايز منها ايه ؟

استغرب رعد طريقة كلام مني وكان مفكرها انها خايفة علي ليان منه فقالها بهدوء وثقة حسيتهم في صوته:

صدقيني يا مني ،،انا ليان عمري ما هأذ*يها ،، انا اتعلقت بيها زي ما هي اتعلقت بيا ومعرفش ازاي وامتي ،، بس دي الحقيقة اللي بقالي فترة بهرب منها بس للاسف مش عارف وعشان كدة بعرفك اني مش وحش او شخص متطرف 

ردت مني بهدوء وهي باصة لرعد وبتشاورله بايديها علي نفسها :

انا مش بسألك يا رعد بيه عشان انا خايفة احسن تطلع وحش ،، انا شوفت انت ازاي مهتم بليان وحامتها لما كانت محتجالك ومتأكدة انها في امان معاك بس مش دي المشكله ولا ده اللي انا خايفه منه 

رعد كشر باستغراب وسأل مني بحيرة وفضول :

اومال ايه اللي مخوفك مني اوي كدة يا انسة مني ،، انا مش فاهم الصراحة 

اتنهدت مني بحيرة وردت بقلق وخوف وهي بتبص لرعد :

خايفة تنجر*ح منك بعد ما اتعلقت بيك،، ليان مالهاش حد غيري وانا مش عايزاها تتجر*ح ،،كفايا اللي حصلها زمان وخلاها بقت كدة ،، عشان كدة مش هسمح ان حالتها تسوء اكتر ،،، لو سمحت يا رعد بيه ،، انا هنا فترة مؤقتة وماشية يعني مش قاعدة علطول وليان مش مستوعبة حاجة زي دي ،، وانا مش عايزاها تتعلق بيك اكتر من كدة عشان متتو*جعش لما نيجي نمشي من هنا فلو سمحت سيبها في حالها وياريت متختلطش بيها او حتي تتكلم معاها .

قالت مني كلامها وسابته وخرجت من مكتبه ورعد وقتها حط وشه بين ايديه ونفخ بغضب لان كلام مني كله صح وهو بيعلق ليان بيه بقربه منها وهو مش متأكد من مشاعره ناحيتها يبقي هي عندها حق بلاش يحاول يقرب منها او يخليها تتعود عليه اكتر من كدة 

وهو ده اللي لازم يحصل 

......................

عدي اسبوع ومعاملة رعد مع ليان اتغيرت تماما بقي يتجاهلها وبيحاول يبعد عنها وميخليهاش تشوفه لدرجة انه بقي يسهر متأخر في شغله ويمشي بدري عشان متشفهوش ،، كان كل ما رعد يفتكر ليان وهي بتعاتبه عشان بعد عنها ومعاملته ليها بجفاء وحد*ة كان قلبه بيو*جعه ،،احساسه في الاسبوع ده كان بيأکدله انه مش بس حب ليان ،،ده عشقها بكيانه وروحه بس للاسف هو شايف من وجهة نظر اختها ان مينفعش لانها مش بعقلها وان حبه ده ملوش اساس من الصحة وانها بمجرد ما تكون بعقلها  الناضج هتبعد عنه ومش هتكون لسة بتحبه زي ما هي دلوقتي ،، كان راجع رعد بليل واول ما دخل جنينة الڤيلا عنيه راحت علي شباكها اللي كانت بتقعد فيه بس اتفاجأ بيها ساندة عالشباك مستنياه بس نامت من غير ما تحس ،، غمض رعد عنيه بو*جع ولقي نفسه بيروحلها ووقف قدامها وبقي يبصلها بشوق لانها كانت واحشاه اوووي ،، كان بيرفع ايديه وبيقربها من شعرها بس قبل ما يلمسها رجع في رأيه وقبض ايديه بغضب وسابها ومشي وهو من جواه بيل*عن مشاعره اللي مش قادر يتحكم فيها دي 

....................

تاني يوم فتحت ليان باب اوضة رعد وهي بتدور عليه بلهفة بس للاسف كالعادة كانت القوضة فاضية فدموعها نزلت بحزن وقفلت الباب واول ما لفت لقت ايمن في وشها فخافت وبصتله بخوف بس هو حاول يطمنها وقالها بابتسامة خبيثة :

متخافيش يا ليان ،، انا مش هضايقك خالص ،، ده انا بس كنت عايز اقولك علي السبب اللي خلي رعد يكر*هك ويبطل يحبك 

كشرت ليان بحزن وبصت لايمن وهي من جواها خايفة منه بس عايزة تعرف ليه رعد متغير عليها وهو شاف الفضول في عنيها فقرب منها خطوة وكمل كلامه بخبث :

ها لسة عايزة تعرفي ولا خايفة مني ؟ ،، لو خايفة خلاص انا همشي بقي ومش هقولك علي حاجة 

قال ايمن اخر كلامه وهو بيسيب ليان وبيعمل نفسه هيمشي بس هي لحقته بصوتها المتردد وقالتله بلهفة :

لا استني يا عمو ،، ااانا خلاص مش خايفة ،، بس ممكن تقولي انا زعلت رعد في ايه ؟ وليه بطل يحبني 

ابتسم ايمن لانه وصل لغرضه وهو ان ليان تطمنله وقالها بخبث :

هقولك طبعا عشان انتي صعبتي عليا ،، بصي كدة الصور دي وانتي تعرفي 

مد ايده ايمن بالصور لليان اللي اخدتهم منه بحذر وبصت فيهم واتصدمت من اللي شافته ،، رعد قاعد مع واحدة في كافيه وماسك ايديها وبيضحكو سوا وباين انه سعيد ومخدتش ليان بالها ان الصور متفبركة فنزلت دموعها بسرعة وحزن وهي حاسة قلبها بيتك*سر ميت حتة وهنا ايمن كمل خطته وهمس في ودنها بفحيح افاعي :

هو بعد عنك ومبقاش يحبك عشان بنت تانية وكمان عشان انتي صغيرة وعقلك عقل اطفال وهو عاوز واحدة تكون عاقلة وتكون جميلة زي البنت اللي في الصورة بالظبط ،، متزعليش انه بعد عنك بس انتي السبب 

كان كلام ايمن بيتردد في ودنها وفي نفس الوقت زكريات قديمة بتحار*بها ومخلياها مشوشة وعقلها مش مستوعب ولا فاهم حاجة ،، سابت ايمن واقف وخدت الصور ومشيت بهدوء ونزلت لاوضتها وكل ده والصداع ماسك راسها والزكريات الغريبة دي مش سايباها ،،وقفت في نص القوضة ومسكت دماغها بايديها الاتنين وهي بتصرخ مرة واحدة بهستيرية عشان الزكريات دي تقف :

بس بقي كفاية كفاية ،،حرام عليكم كفاااايا 

قالت ليان اخر جملة ووقعت اغمي عليها وفي نفس الوقت كانت جت مني اختها علي صوتها واول ما شافتها واقعة في الارض ومغمضة عنيها صرخت بكل قوتها وكان وراها رعد اللي كان لسة جاي فجأة عشان يتطمن علي  ليان لانها صعبت عليه بس اول ما سمع صوت صريخ مني اختها قلبه اتقبض وقرب بلهفة عليهم واول ما لمح ليان واقعة عالارض  قرب بسرعة وشالها وخرج بيها علي المستشفي وهو متابعها بخوف وقلق مسيطرين عليه من انها تروح منه ويبقي هو السبب 

......................

بعد ساعة في المستشفي  كان واقف رعد هيتجنن علي ليان اللي اخدوها منه ومش عارف اي حاجة عنها ،،كان واقف زي المجنون برة قوضة الكشف ومعاه مني اللي كانت قاعدة عالكرسي وبتعيط وهي بتأنب نفسها بانها السبب في كل اللي حصل لاختها ،، انتبهو هما الاتنين للدكتورة اللي خرجت اخيرا من قوضة الكشف فجريو عليها رعد ومني اللي بدأت الكلام بلهفة وخوف :

طمنيني يا دكتورة ،، اختي ليان مالها ،، ارجوكي طمنيني 

الدكتورة بصت لمني وردت بابتسامة حاولت منها تطمن مني عشان تعرف تتكلم معاها :

ارجوكي اهدي ،، هي كويسة الحمد لله بس انا اديتلها مهدئ هينيمها شوية لحد ما اعرف منك حالتها بالظبط 

رد رعد بحد*ة من خوفه علي ليان ومكنش حاسس بتصرفاته خالص وكل اللي شاغله انه يطمن عليها وبس :

ولما احنا اللي نقولك حالتها يبقي انتي لازمتك ايه ؟،، احنا اللي بنسألك مش انتي اللي خارجة بتسألينا هي مالها 

الدكتورة بصتله بصدمة وضيق بس حاولت تعذره لانها شافت الخوف والقلق باينين عليه وتوقعت انه ممكن يكون جوز ليان فقالتله بتبرير:

حضرتك انا مش بسأل علي حالتها اللي جاية بيها وده واضح جدا انه انهيار عصبي بسبب صدمة اتعرضتلها لكن انا بسأل عن حالتها لاني من ملاحظاتي انها كانت جاية مش طبيعية وبتتكلم بطريقة انها  طفلة مش شابة ناضجة 

مني ردت بسرعة وحزن عشان تحاول تلطف الجو وتصلح اللي عمله رعد :

اسفين يا كتورة ،، رعد بيه ميقصدش ،،وفعلا انتي عندك حق ،،ليان اختي حصلها حاجة من وهي صغيرة وده السبب في اللي هي فيه دلوقتي 

وبدأت مني تحكي للدكتورة الحكاية اللي خلت ليان تكون بالشكل ده وكل ده تحت نظرات رعد المصدوم واللي فهم اخيرا خوف مني علي اختها وكلامها معاه عن ليان وانها خايفة عليها احسن تتجر*ح منه وحالتها تسوء اكتر بعد ما حبته واتعلقت بيه ،، بعد ما خلصت مني كلامها ابتسمت الدكتورة وردت بهدوء :

تمام انا كدة فهمت كل حاجة عشان اعرف اتعامل معاها اما تفوق ،،اتمني محدش يتكلم معاها في حاجة وياريت بعد ما تفوق متشوفش اي حاجة ليها علاقة باللي اتسبب في حالتها دي 

رعد هو اللي رد المرادي بجدية وقلق وهو باصص لمني : 

هو اصلا ايه اللي حصلها وخلاها تجيلها الحالة دي 

بصتله مني بضيق لانها بتلومه  بسبب بعده عن ليان وان هو اللي عمل فيها كدة لانها اتعلقت بيه اوي 

دور رعد وشه بحزن وهو بيلعن نفسه لانه كان السبب في اذ*ية اكتر انسانة حبها في حياته 

............................

بعد كام ساعة دخل رعد بخطوات بطيئة اوضة ليان بعد ما استأذن من الدكتورة انه يطمن عليها فقرب منها وهو بيبصلها بنظرات كلها خوف وقلق وندم ومشاعر كتير متلغبطة ،، مد ايديه ومسك ايديها براحة وهو من جواه بيتمني انها تقوم وتبقي كويسة وهو يوعدها انه مش هيتخلي عنها ابدا وهيفضل معاها حتي لو في يوم من الايام ممكن تسيبه لما تبقي كويسة ،، حس بحركة ايد ليان وهي بتضغط علي ايديه براحة فبصلها وهي بتفتح عنيها وابتسم بفرحة لانها فاقت وليان فضلت بصاله شوية وبعدين اتفاجأ بيها ........يتبع

↚

ممكن تناديلي اختي ؟

اتصدم رعد من طريقة ليان الغريبة فقرب منها بلهفة وقالها وهو بيتبت في اديها :

ليان انتي كويسة ؟،، حاسة بحاجة طمنيني عليكي 

ليان بصت لرعد ببرود عكس اللهفة اللي شايفاها في عيونه وسحبت ايديها بهدوء وهي بتبعد وشها عنه الناحية التانية :

انا كويسة ،، ممكن تسيبني لوحدي 

كشر رعد باستغراب وكان بيكلم نفسه وانه مش دي ليان اللي هو عارفها ،، اللي اول ما بتشوفه بتنسي اي حاجة وتجري عليه ،، كان شكلها المرادي غريب كأنها ناضجة مش طفلة زي ما هو عارفها :

ليان انتي كويسة ،، انا عارف انك زعلانة مني بس انا 

قاطعته ليان وهي بتلف وشها وبتبصله بجمود ودموع محبوسة في عنيها :

ميهمنيش ولو سمحت اخرج برة وابعتلي مني اختي ،،ااانا مش عاوزة اشوفك 

رعد قلبه و*جعه من كلامها فقام بهدوء وبصلها بنظرة اخيرة وخرج وهو كل اللي داير في دماغه واللي كان خايف منه حصل وهو ان ليان استعادت عقلها وبقت كويسة جدا وانها خلاص مبقتش شايفاه زي الاول ومش محتجاه في حياتها ،، خرج رعد من الاوضة وبص لمني اللي بصتله بلهفة :

ليان فاقت وبقت كويسة وعايزاكي 

مني مستنتش رعد يكمل كلامه وسابته ودخلت لليان الاوضة وقربت منها بفرحة لانها فاقت وبقت كويسة وبقت تقولها بحب :

حبيبتي ،،انتي كويسة ،، انا السبب حقك عليا ،، انا اللي عملت فيكي كدة

اتفاجأت مني بليان وهي بتحضنها وبتعيط بحرقة وبتتكلم بس المرادي مش ليان الطفلة ،، دي ليان الشابة الناضجة :

انا تعبانة اوي يا مني ،، حاسة ان روحي بتتسحب مني ،،مكنتش متخيلة اني اكون بالنسباله ولا حاجة كدة ،، عمل فيا زي ما بابا وفؤاد عملو زمان ،،ليه كل اللي بيقربو مني بيبعدو عني وبيكر*هوني ليه يا مني ليه َ؟

مني كانت مصدومة وهي بتسمع طريقة كلام ليان ومركزتش في كلامها قد ما ركزت انها بقت طبيعية  فبعدتها عن حضنها ومسكتها من وشها وهي بتقولها بفرحة :

ليان ،،اانتي خفيتي ،،انتي رجعتي تاني ،،انا مش مصدقة ان ده حصل ،، انتي رجعتي ليان اختي ،، اااه يا ليان 

قالت مني اخر كلامها وهي بتضم ليان لحضنها وبتعيط بس بدموع فرحة وليان دفنت وشها في حضن مني وبقت تعيط بس و*جع من صدمتها في رعد اللي حبته من قلبها بس هو اتخلي عنها وسابها عشان واحدة تانية 

........................

بعد اسبوع من الاحداث اللي حصلت كانت واقفة مني قدام فريدة في اوضتها وبتقولها بابتسامة :

انا بجد يعز عليا فراقك يا ست فريدة لاني حبيتك اوي واتعودت عليكي كأنك امي ،، بس خلاص حضرتك بقيتي احسن وانا خلصت شغلي هنا ولازم امشي 

فريدة ابتسمت بحزن وردت من بين دموعها علي مني :

وانا ربنا يعلم حسيتك بنتي ويعز عليا فراقك ولو بايدي كنت خليتك جمبي علطول ،، بس انا عارفه انك فرحانة عشان ليان خفت وبقت كويسة وانكم هترجعو تعيشو حياتكم طبيعي من تاني وعشان كدة هسيبك تمشي ،، بس قوليلي الدكتورة طمنتك عليها وقالتلك ايه ؟

اتنهدت مني بحزن وهي بتفتكر كلام الدكتورة وفي نفس الوقت كان رعد داخل لامه الاوضة وسمع مني وهي بتتكلم وبتحكي لفريدة عن اللي قالته الدكتورة :

والله انا مش عارفة افرح ولا ازعل ،، المفروض اني افرح ان ليان خفت بس الدكتورة قالتلي انها خفت نتيجة صدمة عصبية حصلتلها وخلتها غصب عنها تخرج من حالة وقوف الزمن اللي كانت معيشة نفسها فيه ،، بس للاسف جه نتيجة صدمة عصبية حاد*ة وده هيأثر عليها اكتر وممكن يخليها تدخل في حالة اكتئاب ،، ولحد دلوقتي يا ماما فريدة هي مش عايزة تحكيلي ايه اللي حصل وخلاها يجيلها انهيار عصبي بالطريقة دي،، دي لاخر لحظة كانت كويسة وسايباها في اوضتها بس لما رجعتلها ملقتهاش واتفاجأت بيها داخلة عليا منهارة كدة ،، هتجنن واعرف مين اللي كان السبب في حالتها دي 

كان واقف رعد وبيسمع كلام مني وسرح في اخر كلامها وان ليان حاجة حصلتلها هي اللي اثرت عليها  كدة ودخلتها المستشفي ،، وبقي يسأل نفسه ممكن يكون ايه حصل ،، وميعرفش ليه فجأة جه في باله انهيارها وصورة ايمن في عقله ووقتها قبض علي ايديه بغضب من فكرة ان ايمن ممكن يكون فكر يضايقها او يقرب منها تاني بس المرادي مكنش هو هنا عشان يلحقها ،،واول ما رعد فكر في كدة لف وخرج بغضب والافكار بته*اجم عقله بميت طريقة 

....................

كانت ليان واقفة في الجنينة بتاعة الڤيلا وبتتفرج عليها كأنها بتودعها ،، كانت دموعها في عنيها وقلبها حاسة انه مخنوق اوي وهيخرج من مكانه ،،فحاولت تمنع نفسها من انها تفكر في رعد عشان متتعبش ولفت عشان تدخل تجيب شنطتها بس خب*طت في رعد اللي كان واقف وراها ومتابع سرحانها ،،فكانت قريبة منه اوي وعنيهم في عيون بعض ،، ليان كانت نظراتها كلها لوم وعتاب وغضب من رعد عشان اللي عمله معاها اما نظرات رعد فكانت اشتياق وحنين لطريقتها معاه وتعلقها بيه وحزن من جواه لانها لما خفت وبقت بعقلها محبتوش زي ما كانت الاول وهو ده اللي كان مخليه بيحاول يمنع نفسه عنها الفترة اللي فاتت لانها مكنتش في وعيها ،، كانت ليان هتسيب رعد وتمشي من جنبه بس هو اتحرك ووقف قدامها وقالها بهدوء :

طيب عالاقل ودعيني يا ليان ،، ليان اللي اعرفها كان زمانها عملت حجات كتير 

ردت ليان بحزن وغضب من رعد وبطريقة خلته بحس منها انها كار*هاه :

ليان الاولانية كانت مغيبة ،، كانت بنت كبيرة بس بعقل طفلة واكيد تصرفاتها مكنتش محسوبة عليها ،، لكن ليان اللي واقفة قدامك دلوقتي هي دي اللي كل كلمة طالعة منها حقيقة وهو ده اللي فعلا حاسة بيه بعد اذنك يا ،، يا رعد بيه 

قالت ليان اللي قالته وسابته ومشيت ورعد كان متابعها بحزن وو*جع غريب حسه ناحية قلبه اللي بينبض بعشقها وللحظة ندم انه بعد عنها ،، يمكن وقتها كان هيبقاله حق انه حتي يعاتبها علي بعدها عنه ،، بس للاسف هو السبب لانه بعدها عنه فجأة من غير حتي ما يبرر سبب بعده عنها ايه 

......................

عدت فترة علي الاحداث اللي حصلت ومني وليان رجعو شقتهم واستقرو تاني من جديد بس للاسف كانت مني طول الوقت زعلانة ومضايقة عشان ليان ،،كانت حاسة انها مش سعيدة ابدا،، حتي ابتسامتها بتكون مزيفة وبتحاول تداري بيها و*جع كبير اوي ،، كانت مني بتفكر في ليان وانها لما كانت مش بعقلها كانت اسعد بكتير من دلوقتي ،، دخلت عليها الاوضة وقعدت عالسرير جنبها فانتبهت ليان ليها واتعدلت في قاعدتها بتوتر حاولت تشيله من جواها ومتبينش ضعفها وبصت لمني اللي ابتسمت بحزن وهي بتقولها :

لسة برضه مصممة تخبي عني يا ليان ؟

ليان غمضت عنيها ودفنت نفسها في حضن مني اختها وكأنها بتستمد الامان :

هو انا وحشة يا مني ؟يعني مستاهلش اني اتحب واني اعيش سعيدة مع الانسان اللي قلبي اختاره 

مني كانت متأكدة ان الكلام علي رعد فطبطبت علي ليان وقالتلها بثقة :

لا طبعا انتي تتحبي ونص كمان ،، انتي تستاهلي انك تتحبي لان عندك قلب بريئ مش عند ناس كتير يا ليان بس انتي ليه شايفة نفسك كدة فهميني

خرجت ليان من حضن مني وهي بتبصلها بحزن وكملت كلامها بوجع :

طب اشمعني هو محسش بيا ،، ليه محبنيش ؟ ،، ليه سابني بعد ما اتعلقت بيه؟ ،، ليه يوجعني بالطريقة دي ويبعد عني فجأة ويخليني احس اني وحيدة اوي كدة ،، ليه يفضل عليا واحدة تانية 

قصدك رعد مش كدة ؟ 

قالتها مني باستغراب وشك وهي شبه متأكدة ان ليان فعلا بتتكلم عن رعد فدموع ليان اكدتلها احساسها لما نزلت بقهر وهي بتحرك راسها بايجابية ،، وقتها مني حست بالذنب لانها السبب في بعد رعد عن ليان ولانها هي اللي طلبت منه كدة ،، بس ده كان خوف عليها احسن تنجر*ح فحاولت مني تتكلم وقالت لليان بصعوبة :

احيانا بيبقي غصب عننا اننا ناخد قرار البعد ورعد اكيد عمل كدة عشانك 

ردت ليان بحد*ة وهي بتقوم وبتتكلم بعصبية :

لا مش غصب عنه ،، هو بعد عني بارادته ،، بعد عشان هو اناني ولقي بنت تانية احسن مني ،، عالاقل مش مريضة حالة نفسية زيي وعقلها عقل طفلة ،، رعد زهق منيِ يا منى وبعد بارادته 

مني دموعها نزلت بندم اكبر وقامت وقفت وهي بتقول بحزن :

للدرجادي حبتيه يا ليان ؟ 

ليان لفت وبصت لمني بحزن ومردتش عليها غير بدموعها اللي مقدرتش تمنعها فكملت كلامها مني بتنهيدة :

انا مكنتش اعرف انك حتي بعد ما ترجعي طبيعية تاني هتفضلي حباه ومتعلقة بيه ،، كنت فاكراها مشاعر مزيفة عشان اهتمامه بيكي مش اكتر ،، انا السبب يا ليان انا اسفة 

ليان بصت لمني باستغراب من كلامها وردت ببهتان :

انتي مش السبب ،، هو اللي سابني وبعد عني بعد ما زهق ومل مني ،، عشان لقي اللي احسن مني ،، انا شوفت صورتهم بعيني وهما مع بعض ،، ايمن ورهاني وقالي انه حب بنت جميلة وان رعد خلاص مبقاش محتاجني في حياته ،، بس يمكن الحاجة الحلوة الوحيدة اللي حصلت هي ان صدمتي في رعد كانت السبب في اني اخف 

كانت مني بتسمع كلام ليان وهي مصدومة ومش مستوعبة اللي قالته وخصوصا عن الصور اللي اتكلمت عنها وايمن اللي هي متأكدة انه بيكر*ه رعد جدا وده لانه باين من معاملته ليه فبصت لليان بجدية وقالتلها ب .......يتبع 

↚

انتي ليه مقولتيش علي كل اللي حصل معاكي ده يا ليان؟ 

قالت كدة مني بصدمة واستغراب ووقتها ليان مسحت دموعها وبصت بعيد وهي بتتكلم بقوة :

مكنش ليه لزوم الكلام وقتها يا ابلة مني ،، لاني شوفت بعيني وكمان شوفت معاملته ليا ،، وتعرفي انا مش زعلانة علي اللي حصل ،، يمكن ربنا كان رايد انه يكون السبب في اني اخف وارجع تاني ليان اللي انتي عارفاها 

مني مكنتش عارفة ترد وتقولها حاجة ،،كل اللي دار بعقلها وقتها ان ليان ربطت تغيير رعد عليها بالصور اللي ورهالها ايمن وهو ده سبب الحالة اللي جتلها وهي صدمتها في رعد لانها كانت متعلقة بيه اوي ،، مني وقتها حست بالذنب اكتر ومقدرتش تتكلم وتقول لليان انها السبب في كل ده وانها هي اللي طلبت من رعد انه يبعد عنها فغمضت عنيها بتعب وهي بتفكر في اللي وصلتله ليان بسببها 

.................

كان قاعد رعد في مكتبه وهو ماسك فونه وسرحان في صورة ليان اللي اخدها ليهم سوا لما خرجو  مع بعض ،، كان بيفتكر براءتها وملامحها اللي عشقها ومحفورة في عقله ،، للحظة افتكر اخر مرة شافها فيها في المستشفي لما كانت بتتكلم معاه بطريقة غير اللي متعود عليها منها ،، كان حاسس انه غريب بالنسبالها وتوقع انها نسيته لما فاقت ورجعت لطبيعتها وطبيعي هتنسي كل حاجة بينهم ،، ل*عن نفسه عشان معاملته ليها قبلها وانه ضيع ايام في بعده عنها مع انه كان ممكن يكون جمبها بس خوفه من اللحظة دي هو اللي منعه واللي كان عامل حسابه حصل ،، انتبه رعد علي صوت رنة تليفونه فاتنهد بحزن ورد بهدوء:

ايوة يا تيتة ،، حضرتك كويسة ؟

ردت فريدة بابتسامة وهي قاعدة مكانها علي الكرسي في الجنينة :

ايوة يا رعد ،، انا كنت محتاجة اتكلم معاك شوية ،،وكمان عايزة اروح مشوار وعايزاك توصلني لانك عارف اني مش هعرف اروح لوحدي 

قام رعد وهو لسة حاطط الفون علي ودنه ورد بجدية قبل ما يقفل :

حاضر يا حبيبتي ،،مسافة السكة واكون عندك ،،مع السلامة 

قفلت فريدة التليفون وحطته قدامها عالترابيزة وسرحت قدامها وهي بتفكر في رعد وحالته من يوم ما ليان مشيت وخصوصا انها كانت ملاحظة تغييره وانه كان وقتها شخص تاني خالص لانه كان بيضحك علطول وبيهزر وحابب وجوده في البيت ،، حاجة جواها قالتلها انه حب ليان واتمنت لو فعلا يكون احساسها صح وانه يكون فعلا حبها وعشان كدة فكرت في حاجة عشان تتأكد بيها ووقتها هيبقالها تصرف تاني ،، عدي شوية ودخل رعد بعربيته واول ما نزل قرب من فريدة جدته وباس ايديها :

اؤمريني يا تيتة ،، حضرتك عايزة تروحي فين وانا اوديكي 

بصتله فريدة بتفحص وهي بتقوله بابتسامة :

عايزة اشوف مني وليان وانا كلمت مني وهي مستنياني دلوقتي عالغدا ،، يلا عشان توديني 

اتفاجئ رعد بكلام فريدة لكنه فرح من جواه اوي وبان علي ملامحه لانه اخيرا هيشوفها حتي لو من بعيد لانها واحشاه اوي :

تمام يلا بينا طبعا ،،هوصل حضرتك وبعدين ارجع الشركة وابقي اجي اخدك 

ابتسمت فريدة بخبث وردت وهي بتقوم :

طب يلا ونبقي نشوف الموضوع ده بعدين 

علي فين العزم كدة 

قالها ايمن وهو داخل عليهم وبيبصلهم باستغراب فنفخ رعد بضيق ومردش لكن فريدة ردت بحب وهي بتشاور علي رعد :

رعد واخدني ازور مني عشان وحشتني ،، عايز حاجة يا حبيبي ؟

كشر ايمن واتوتر وهو بيبص لرعد وبعدين اتكلم بضيق:

هو احنا مش كنا خلصنا من قصة البنات دول  

رد رعد بحد*ة وهو بيبص لايمن بتحذير :

ياريت تخليك في حالك وملكش دعوة باي حاجة تخصهم ،،محدش اساسا طلب رأيك ،،يلا يا تيتة   

مشي رعد وفريدة وكان متابعهم ايمن وهو بيبرطم وبيبتسم بسخرية 

........................

كانت واقفة ليان في المطبخ بتساعد مني وهي متوترة وباين عليها القلق وكانت ملاحظة مني توترها وتوقعت السبب وفعلا لقت ليان بتسألها بتردد:

مني هي مدام مرفت هتيجي لوحدها ؟

مني ابتسمت بتلقائية وبعدين عملت نفسها مش فاهمة وردت بخبث:

اه طبعا اومال يعني هتيجي مع مين ،، ولا انتي تقصدي حد معين 

ردت ليان بسرعة وهي بتلف وشها بعيد بتوتر :

ها ،،لا طبعا اكيد مقصدش حد ،، انا بس بسأل عشان الاكل وكدة ،، عموما انا خلصت اللي طلبتيه مني ،،هروح بقي اغير هدومي 

خرجت ليان بسرعة تحت نظرات مني الحزينة علي حال اختها واتمنت لو تقدر تصارحها وتعرفها ان رعد مكنش بارادته لما بعد عنها بس هي خايفة ليان تزعل منها وتفقد ثقتها فيها،، سابت اللي في ايديها بعد ما خلصته وراحت هي كمان تغير هدومها ،، شوية ورن جرس الباب فخرجت ليان من اوضتها وراحت تفتح هي الباب واول ما فتحت ابتسمت بتلقائية وهي بترمي نفسها في حض*ن فريدة  :

تيتة فريدة ،،وحشتيني اوي اوي 

ابتسمت فريدة وردت بحنان وهي بتطبطب علي ضهر ليان :

ولما انا وحشاكي يا بكاشة مكنتيش بتسألي عليا ليه 

ابتسمت ليان بتوتر ومردتش وكانت هتقفل الباب بس كملت فريدة كلامها وهي بتشاور عالباب :

استني متقفليش ،، رعد طالع ورايا ،،كان بيركن عربيته وزمانه جاي 

قلب ليان دق جامد اوي وحست ان نفَسها مبقاش منتظم لانه واحشها اوي ومش عارفة لو شافته قدامها هتقدر تمنع روحها ومترميش نفسها  في حض*نه ولا لا  ،، قط*ع افكارها لما شافته قدامها بهيئته اللي بتخطف قلبها ،،كانت بصاله وعنيها متثبته في عيونه ووقتها كأن الوقت وقف ،،كانت لحظات بس كأنها سنين ،، كان رعد بيبصلها ونفسه يشدها لحض*نه ويشدد عليها كعقاب منه علي بعدها عنه ،، فاقو هما الاتنين علي صوت مني اللي اتكلمت بفرحة وهي بتسلم علي فريدة بحرارة ووقتها رجعت ليان للواقع وسابتهم ودخلت المطبخ عشان تهرب من عيون رعد ومن توترها في وجوده ،،دخلت المطبخ ووقفت وهي بتحط ايديها علي قلبها يمكن يهدا من كتر ما بيدق جامد ،، عيونها دمعت لما اتأكدت اكتر انها محبتش حد في حياتها قد ما حبته بس للاسف ،، سمعت صوت مني بتناديها فصبت عصير بسرعة وخرجت واول ما خرجت بالصنية استغربت مني وقالتلها :

انتي صبيتي عصير ليه يا ليان ؟،، احنا لسة هنحط الغدا 

اتوترت ليان اكتر وبصت لرعد اللي كان بيبصلها وشبح ابتسامة علي وشه وكأنه فاهم انها متوترة بسببه واللي كشفتها مني اختها من غير ما تقصد فاتكلمت بتهتهة  :

ممنا قولت يشربو حاجة علي ما احضر السفرة ،، عموما هروح بسرعة احط الاكل 

رعد قام بتلقائية واتكلم بهدوء وهو بيقرب من ليان:

خليني اساعدك 

كانت لسة ليان هتعترض بس رعد مدهاش فرصة واخد منها الصنية وسبقها عالمطبخ ،، اتنهدت بحيرة ودخلت وراه وهي بتدعي ربنا انها تعرف تسيطر علي نفسها قدامه ،، دخلت ليان المطبخ وكان واقف رعد مستنيها واول ما دخلت بصتله بتوتر وسابته وبدأت تشوف هتعمل ايه لحد ما سمعت صوته من وراها :

وحشتيني 

غمضت ليان عنيها بو*جع  مع صوت ضربات قلبها من تأثير نبرة صوته عليه بس افتكرت وقتها الصور اللي ورهالها ايمن ففتحت عنيها تاني وردت بجمود من غير ما تلف :

معتقدش ان ليان اللي قدامك دلوقتي هي اللي وحشتك يا رعد بيه ،،عشان ليان القديمة ماتت خلاص 

قرب رعد منها ولفها ليه وبص في عنيها وهو بيقولها :

ليان اللي عرفتها هي نفسها اللي قدامي دلوقتي ،،الا لو انتي اللي شايفة حاجة تاني وشايفاني رعد تاني غير اللي عرفتيه 

ليان بعدت ايدين رعد عنها وهي بترد ببرود وبتقوله:

بالظبط كدة ،، ليان الجديدة مبقتش شايفاك رعد اللي قبل كدة واعتقد انت كمان اكتشفت ده من قبلي بدليل انك كنت بتهرب مني وبتبعد عني ولا نسيت 

رعد فرح لانها فاكرة كل حاجة بينهم لسة وكان هيرد ويدافع عن نفسه ويقولها ان اختها هي اللي طلبت منه يبعد بس رجع في كلامه وسكت فابتسمت بسخرية ودورت وشها بعيد عنه فاتنهد رعد بغضب وسابها وخرج فبصت ليان مكانه ودموعها نزلت بصمت لانها كانت مستنية منه حتي يدافع عن نفسه او يبرر معاملته ليها بس للاسف سكت وانسحب وده اكدلها كلام ايمن 

..........................

بعد الغدا كانو كلهم قاعدين مع بعض ما عدا ليان اللي سابتهم ودخلت اوضتها ومخرجتش منها وده ضايق رعد اوي وافتكر انها مش عايزة تشوفه فقام وهو بيقول بجدية :

يلا يا تيتة اعتقد كفايا كدة لاني ورايا شغل لازم اخلصه ضروري 

بصتله فريدة بحيرة وبعدين بصت لمني بتشجيع بعد ما حكتلها  مني كل حاجة وكمان موضوع الصور بتاعة ايمن اللي قالتلها عليه ليان فاتوترت مني وهي باصة لفريدة وحاولت تتشجع فقامت وبصت لرعد وقالتله بتردد:

كنت محتاجة اتكلم معاك شوية يا رعد علي انفراد لو سمحت 

استغرب رعد بس وافق وحرك راسه بايجابية وهو بيقولها بابتسامة:

اكيد طبعا ،، اتفضلي 

سبقته مني علي البلكونة ورعد راح وراها وهو كل تفكيره في ليان وفي نفس الوقت كانت خرجت ليان من اوضتها واستغربت اما شافتهم داخلين البلكونة سوا وخافت احسن مني تقول لرعد علي الكلام اللي قالتهولها بخصوص ايمن فقعدت بتوتر وهي بتفرك في ايديها لحد ما انتبهت علي صوت فريدة اللي اتفاجأت بيها بتقولها .....يتبع 

↚

انتي بتحبي رعد يا ليان ؟

اتصدمت ليان اول ما سمعت سؤال فريدة اللي مكنتش متوقعاه ابدا ومكنتش عارفة ترد بس سؤالها خلي ليان تبعد عنيها وتروح بتلقائية لرعد اللي كان واقف مع مني وكانت ليان بصاله بحنين وحزن الدنيا كله في قلبها :

معتقدش ان السؤال ده هيفرق دلوقتي يا تيتة بس هجاوبك ،، رعد كان بالنسبالي الامان في الغربة اللي كنت عايشة فيها ،، كان طوق النجاه لليان الطفلة اللي كانت بتخاف دايما واحساس الوحدة ملازمها ،، رعد حبه سكن قلبي من اول مرة شوفته فيها ،،رغم حد*ته معايا في اول لقاء بينا بس كنت حاسة براحة في وجوده 

فريدة كانت متفاجئة من كلام ليان ،، يمكن كانت ملاحظة تعلقها برعد بس متخيلتش انها ممكن تكون بتحبه اوي كدة حتي بعد ما رجعت لعقلها وبقت طبيعية فسألتها بغموض رغم انها عارفة الاجابة بس كانت عايزة تسمع منها   :

وايه اللي خلاكي بعدتي ؟،، رعد هو هو رعد متغيرش وانتي اهو لسة زي ما انتي متغيرتيش يا ليان 

ابتسمت ليان بو*جع والدموع في عنيها :

مين قالك ان مفيش حاجة اتغيرت بالعكس ،، كل حاجة كانت متغيرة ،،من قبل ما ارجع ليان اللي حضرتك شايفاها يا تيتة ،، رعد كانت مشاعره ناحيتي واضحة من البداية بس انا اللي كنت غ*بية وعشان حبيته مشوفتش ده وسمحت لنفسي اني اعيش في وهم حبه ،، من فضلك يا تيتة انا مش عايزة رعد يعرف اي حاجة عن اللي قولته لحضرتك دلوقتي 

ابتسمت فريدة وهي بطبطب علي ايد ليان واتكلمت بحنية  :

متقلقيش يا حبيبتي ،، بس عايزة نصيحتي ،، انتي اتسرعتي يا ليان في الحكم علي رعد ،، جايز في حاجة ناقصة انتي متعرفيهاش وكل اللي عايزة اقولهولك هو ان ايمن حفيدي زي رعد بالظبط وانا عارفاهم اكتر من نفسي وعارفة ومتأكدة ان ايمن من صغره وامه مربياه علي كر*ه رعد وعشان كدة بيشوف ايه اللي بيحبه رعد ويحاول يبعده عنه  

كشرت ليان باستغراب وهي بتفكر في كلام فريدة وفهمت انها عارفة كل حاجة بس مهتمتش ،،كل اللي شاغلها الكلام اللي قالته عن ايمن وده خلاها تفكر وهي بترجع بعنيها تبص علي رعد اللي كان بيتكلم 

.....................

انتي بتقولي ايه يا مني ،، انتي متأكدة من الكلام اللي بتقوليه ده ؟

قالها رعد بصدمة وهو مش مستوعب اللي قالته مني فكملت هي كلامها بتأكيد:

ايوة يا رعد متأكدة، والكلام ده اللي قالتهولي ليان بنفسها ،، رعد انا مش بقولك الكلام ده عشان اعمل مشكلة بينك وبين قريبك ،، بس انا حسيت اني ظلمت اختي بايدي لما طلبت منك تبعد عنها وعرفت متأخر منها انها ربطت بُعدك عنها بالصور اللي شافتها وعشان كدة هي يعني ،،

كمل رعد كلام مني بتنهيدة بعد ما فهم كل حاجة :

عشان كدة قررت تبعد عني  ،، فهمت يا مني فهمت،، انا برضه كنت مستغرب انها فاكرة كل حاجة حصلت قبل كدة ومع ذلك لسة واخدة موقف مني ،،بس  استني هو ايمن اتكلم معاها في نفس اليوم اللي هي تعبت فيه وجالها انهيار عصبي مش كدة ؟

حركت مني راسها بايجابية وردت بحزن وهي بتحاول تمسك دموعها :

للاسف متحملتش كلام ايمن عنك وصدمتها فيك كانت كبيرة عليها وعشان كدة تعبت وحصل اللي حصل ،، بس انا للاسف مقدرتش اصارحها واقولها اني السبب في كل ده واني انا اللي طلبت منك تبعد عنها ،،خوفت احسن اخسرها يا رعد وانا مليش غيرها وهموت لو بعدت عني 

قبض رعد علي ايديه بغضب وهو بيتوعد لايمن باشد العقاب وبص لليان اللي كانت قاعدة بعيد مع فريدة وعنيها عليه وابتسم ليها بحزن بس هي حاولت تبان طبيعية ودورت وشها بعيد عنه فساب مني ودخل وقرب منها وبص لفريدة اللي ابتسمت ليه بتشجيع فقعد علي رجليه قدام ليان اللي اتفاجأت بيه بيمسك ايديها وبيقولها بعشق :

تتجوزيني يا ليان ؟

ليان كانت مصدومة ومش متخيلة انه ممكن رعد يطلب منها انها تتجوزه وللحظة فكرت في مني وانها عشان كدة كانت واقفة معاه وافتكرت ان مني حكتله اللي حصل عشان هي صعبانة عليها حالتها وده خلي رعد يشفق عليها ويقرر يتجوزها فقامت بغضب وردت بحد*ة وهي بتسحب ايديها بع*نف من ايد رعد:

بقي هو الموضوع كدة ؟،، ابلة مني اصعب عليها بتطلب منك تتكرم وتتجوزني ،،لا يا حضرت ،،انا مش للدرجادي حالتي صعبة ،، وانا بقي مش موافقة اتجوزك يا رعد ولو كنت اخر راجل في الدنيا 

قالت ليان اللي قالته وسابتهم ودخلت اوضتها وقفلت علي نفسها وبعدين رمت نفسها علي سريرها وبقت تعيط بحرقة ،، اما برة فكان واقف رعد مصدوم من كلام ليان وتحليلها للي حصل ومني كانت مخنوقة ومضايقة عشانهم وحاسة انها السبب فقالت بلهفة ودموع :

اانا اسفة اوي ،،انا السبب في كل ده ،،انا لازم اعرفها الحقيقة واقولها اني انا خليتك بعدت عنها ،،لازم تعرف الحقيقة 

كانت مني هتدخل بعد كلامها  بس لحقها رعد ووقفها بصوته وهو بيمسك ايديها :

استني يا مني لو سمحتي متعمليش كدة ،، ليان دلوقتي مجر*وحة وانا عاذرها ،،متقلقيش انا هتصرف وهصلح كل حاجة بس في وقتها ،،يلا يا تيتة ،، وانتي يا مني اوعي تتكلمي معاها او تقوليلها حاجة لو سمحتي 

حركت مني راسها بحزن وهي من جواها قلبها بيتق*طع علي حالة ليان اختها 

..........................

عدي يومين كانت ليان فيهم حبيسة اوضتها مبتخرجش غير للحمام وترجع تاني ،،حتي كلامها مع مني بقي شبه معدوم اما رعد فكان بيفكر كويس اوي عشان يعرف يتصرف كويس ،،دخل رعد الڤيلا ببرود وهو حاطط ايديه في جيوبه وكان قاعد ايمن بيلعب في تليفونه وقاعدة جمبه فريدة اللي كانت مضايقة منه اوي علي اللي عمله مع رعد بس متكلمتش بناء علي رغبة رعد ،، دخل رعد وقعد بهدوء واتكلم وهو باصص لفريدة بخبث :

ها يا تيتة كلمتي الناس وعزمتيهم علي فرحي ،، انا خلاص طبعت دعاوي الفرح وحضرت كل حاجة 

رفع ايمن عنيه باستغراب وهو شايف الفرحة في عيون رعد فسأله بغموض :

جواز وبالسرعة دي ،، ويا تري مين العروسة بقي اللي لقيتها بسرعة اوي كدة ؟

ابتسم رعد ورد بقصد وهو بيحط رجل علي رجل وبيراقب تعبيرات ايمن :

سرعة ايه بس ،، وبعدين العروسة انت عارفها كويس اوي يعني مش حد غريب ،، ليان اخت مني الممرضة بتاعة تيتة 

اتصدم ايمن واتعدل وهو بيردد بتهتهة واستغراب :

ليان ،، ازاي ،،وهي وافقت عليك ؟

ابتسم رعد ببرود واتأكد ان ايمن فعلا عمل كل اللي قالتله عليه مني فرد بخبث :

ايوة طبعا موافقة وايه اللي هيخليها تمانع مثلا 

اتوتر ايمن ورد بتردد وهو بيقوم يقف :

ها ،،لا مفيش بس يعني ،، سمعت انها رجعت تاني لعقلها فقولت انها نسيت كل حاجة بقي 

رد رعد بغموض وهو بيقوم وبيقف قدام ايمن :

قصدك موضوع الصور اللي وريتهولها ،، لا متقلقش هي عارفة انك ند*ل وخسيس وبتكر*هني فمستحيل تصدق الاعيبك القذ*رة 

اتفاجئ ايمن بكلام رعد فاتوتر وعرق ورد بتهتهة :

ايه ،، صور ايه ،،انا مش فاهم حاجة 

رعد بصله شوية وبعدين رفع ايديه وفجأة ضر*به بالبو*كس في وشه ومسكه من لياقة قميصه وهمس قدام وشه بحد*ة :

عارف انا لولا ان تيتة واخدة مني وعد اني مأ*ذيكش انا كنت عملت فيك ايه ،، بس حظك انها دافعت عنك ،،رغم انها عارفة انك تستاهل اكتر من كدة ،، فانا هرحمك المرادي بس لو فكرت مجرد التفكير انك تقرب من حاجة تخصني ،، صدقني مش هيكفيني عمرك 

ايمن كان بيبصله وهو بيتو*جع وحرك راسه بخوف وقال بأ*لم :

حاضر ،، بس سيبني 

رعد كمل كلامه بغضب وتحذير وهو باصص لايمن:

هسيبك بس لو لمحت خيالك بس قريب من الڤيلا دي ،، يبقي انت اللي جبته لروحك ،، غوووور 

سابه رعد فجري ايمن بسرعة وهو بيمسك وشه بو*جع من اثار الض*ربة ووقتها قعد رعد وهو بيتنهد بغضب وكانت ملاحظاه فريدة بخوف وحزن عليه فاتكلمت بقلق :

هتعمل ايه مع ليان يا رعد ،، هي لازم تعرف الحقيقة وانك مسيبتهاش عشان حد زي ما هي فاكرة ،،لازم تقولها ان الصور دي مزورة 

رد رعد وهو بينهج وبيفكر في ليان :

مش هقدر اتكلم او اقولها ان اختها اللي طلبت مني ابعد،، مينفعش اصلح علاقتي بيها علي حساب علاقتها باختها يا تيتة ،، مش هعرف اعمل كدة 

اتنهدت فريدة بحزن وردت وهي بتبص لرعد بشفقة :

عندك حق بس حرام اللي انتو فيه ده ،، يعني انتو الاتنين بتحبو بعض وتستاهلو تبقو مع بعض ،، حاول تتصرف يا رعد ،، ليان بتحبك وعشان كدة مو*جوعة اوي منك 

غمض رعد عنيه بحزن وحيرة ورد بصوت مخنوق :

عارف يا تيتة ،،عارف وهو ده اكتر حاجة تعباني ،، علي قد فرحتي انها لسة بتحبني بعد ما بقت كويسة علي قد ما انا حزين اني مش قادر اصارحها بحقيقة مشاعري 

......................

بعد يومين كانت واقفة ليان في البلكونة وسرحانة في رعد لما كان بيطلب منها تتجوزه ،، كانت بتتمني جملة زي دي منه بس دلوقتي مش هينفع توافق،، لانها متأكدة انه بيعمل كدة بس عشان عرف انها بتحبه وانها صعبانة عليه ،، انتبهت لصوت مني من وراها وهي بتقولها بحزن:

هتفضلي عاملة في نفسك كدة يا ليان ،، ليه تو*جعي قلبك مع ان بايدك تعيشيه سعيد مع الانسان اللي حبه 

لفت ليان بغضب وردت باندفاع وزعل من مني عشان قالت لرعد الحقيقة:

اخلي قلبي يعيش سعيد ازاي وهو عارف انه معاه عشان بيشفق عليه ،، عشان انتي روحتي طلبتي منه يتجوزني عشان صعبان عليكي حالتي ،،ليه تعملي كدة يا مني ،، ليييه،، ليه تخليه يتجوزني شفقة مع انه مش بيحبني ،،انتي ترضيها عليا ليه ؟

ردت مني باندفاع وهي بتقرب من ليان وبتتكلم بسرعة:

غلط ،،كل اللي بتقوليه عن رعد غلط ،، رعد بيحبك ومحبش حد قدك ،، افهمي بقي ،، هو اتقدملك عشان بيحبك والصور اللي شوفتيها دي كلها متفبركة ،، ايمن عمل كدة عشان يبعدك عن رعد لانه بيكر*هه وعشان شايف رعد حبك واتعلق بيكي ازاي 

ليان كانت بتسمع مني ونفسها لو تصدق كلامها ،، قلبها بيقولها ان كلامها صدق وان رعد مظلوم بس ليه بعد عنها فجأة ،،ليه اتغير عليها ،، مسكت ليان دماغها بتعب وردت بحزن :

حتي لو كلامك صح وان رعد مظلوم ،، من قبل اصلا موضوع الصور دي ورعد كان متغير ،،كان بيتعمد يبعد عني ،، كان شايفني قد ايه محتجاله وكان بيتجاهلني ،، كان بيعاملني وحش اوي كأني كنت مفروضة عليه ،، اشمعني في الوقت ده بالذات ،،الا بقي لو كان فعلا في حياته حد تاني 

بصتلها مني بتردد وبعدين قررت تتكلم عشان حياة ليان وسعادتها تعمل اي حاجة،، اخدت نفس عميق وبعدين اتكلمت بهدوء :

انا السبب يا ليان 

كشرت ليان باستغراب وهي بتبص لمني اللي كملت كلامها بحزن وهي بتقرب وبتمسك ايديها :

انا اللي طلبت من رعد انه يبعد لما شوفتك متعلقة بيه اوي كدة ،، صدقيني عملت كدة من خوفي عليكي،،خوفت تحبيه وتتعلقي بيه ولما نمشي تنجر*حي وتتكوي بعذ*اب بعدك عنه ،، خفت احسن يكون اللي من ناحيتك ليه مجرد تعلق  مش حب ،، طلبت منه يبعد وميقربش ليكي تاني ،، صدقيني كنت فاكرة اني بحميكي وهو لبي رغبتي وبعد عنك رغم انه كان بيت*عذب زيك بالظبط ،، وانا بعد كدة خفت اقولك تزعلي مني وتبعدي عني انا اسفة يا ليان 

غمضت ليان عنيها بحزن وهي بتستوعب كلام مني ،، كانت بتفكر في كل كلمة قالتها وبتحاول تفهمها ،، هي مقدرة مشاعر اختها وانها خايفة عليها والاهم ان رعد مبعدتش بارادته ،، شبح ابتسامة ظهرت علي وش ليان وبصت لمني ومدت ايديها ومسحت دموعها بحنية وهي بتقولها  :

وانتي متخيلة ان بعد السنين دي كلها وبعد ما كنتي ليا الام والاب والصديق اجي انا وفي لحظة افهمك غلط وابعد عنك لانك عملتي اللي اي حد مكانك هيعمله ،، اانا عمري ما هزعل منك او اعاتبك لاني عارفة انك بتحبيني اكتر من اي حد في الدنيا يا مني 

مني ابتسمت من بين دموعها وشدت  ليان لحضنها وبقو يعيطو هما الاتنين سوا بس بدموع فرحة وحب وشوية ومني خرجت ليان من حضنها وقالتلها بابتسامة :

اهم حاجة انك عرفتي ان رعد بيحبك وانه بجد اتظلم يا ليان وحتي بعد ما قولتله الحقيقة واني خايفة اقولك مرضاش يتكلم عشان خايف احسن نبعد عن بعض او تزعلي مني 

ليان اتنهدت وهي بتفكر في رعد وبصت للمني وقالتلها بابتسامة :

انا هروح لرعد يا مني 

.........................

كان قاعد في مكتبه ومدور الكرسي بتاعه لورا وباصص علي الناس من الازاز بتاع مكتبه وكان بيفكر في ليان وازاي يصلح علاقته بيها من غير ما يقولها الحقيقة ،، فجأة قلبه دق وملامحه اتأثرت اول ما سمع صوتها من وراه بتنده اسمه بلهفة :

رعد    

انتبه رعد لصوتها ولف بالكرسي بسرعة وشافها قدامه بهيئتها اللي بيعشقها وابتسامتها اللي بتحرك قلبه فقام بسرعة وقرب منها بس هي فجأته لما اترمت في حض*نه وضمته ليها بحنين ،، رعد وقتها اخد نفس جامد وكأنه بينعش روحه بضمتها واتكلم بحب :

انتي ازاي هنا فهميني ،، انا كنت هاجيلك واحاول اتكلم معاكي و

قاطعته ليان وهي بتحط ايديها علي شفايفه وبتبتسم :

هششش ،،انا عرفت كل حاجة ،،مني قالتلي 

اتنهد رعد براحة ومسك ايد ليان وقالها بعشق وهو بيقرب من وشها :

كنت هتجنن عليكي يا ليان ،، قلبي كان مهجور ووحيد من غيرك ،، انتي الوحيدة اللي خليتيني احس اني عايش بعد ما كنت زي الانسان الالي من غير مشاعر ولا قلب يحس وكنت خايف كل ده يروح لما تبعدي عني واخسرك 

ردت ليان وهي بتشبك ايديها في ايد رعد وبتمشي معاه برة الشركة :

من انهاردة مش هنبعد عن بعض ابدا وهفضل دايما معاك يا رعد وهتفضل ليا انا وبس مش كدة ؟

ضحك رعد بصوته ورد بجاذبية وهو بيتبت في ايديها :

وانا ملكك يا اميرتي وعمري ما هكون لحد غير ليكي ،، بحبك يا ليان 

ليان بخجل : مش اكتر مني يا رعد 

تمت 

تعديل المقال